Депутат бұған ДСМ бұйрықтарындағы қарама-қайшылық себеп деп отыр.

Мәжіліс депутаты Асхат Аймағамбетов елдегі емдеу хаттамалары уақытылы жаңартылмайтынын айтты, деп хабарлайды inbusiness.kz сайты.

"Әр азаматты емдегенде, дәрігерлер, арнайы емдеу хаттамасында көрсетілген дәрілерді қолдануы тиіс. Ал емдеу хаттамалары болса уақтылы жаңартылмайды. Өздеріңіз қараңыздар, клиникалық хаттамалардың шамамен 70%-ы 5 жылдан 12 жылға дейін қайта қаралмаған. 10 жыл емес, қазір 1 жыл ішінде жаңа дәрілер пайда болады. Осыған байлапнысты қазақстандықтар жаңа әдістермен ем ала алмай жүр деп айтуға болады", – деді депутат.

Сөзінше, хаттамаларды бекіту процесінің өзі де күрделі.

"Кейде ол бірнеше жылға дейін созылып, осылайша бекіткен хаттаманың актуалдылығы да жоғалады. Мысалы, тіркеу мерзімі өткен және тиімділігі төмен, шығаруға ұсынылған 409 препарат 3 жыл бойы формулярдан алынбаған, тиімсіз деп танылған 5 препарат 29 ауруды емдеу хаттамаларынан шығарылмаған. Ал қажет делінген 96 тиімді препарат керсінше формулярға енгізілмеген. Мұндай ақылға сыймайтын жағдайдың себебі – министрліктің бұйрықтарындағы қарама-қайшылықтар", – деді Асхат Аймағамбетов.