Париждегі Ролан Гаррос додасына ширек финалға шыққан ойыншылар толықтай анықталды. Әу баста Қазақстанның бес теннисшісі іріктеу турниріне қатысты. Бірақ бәрінің бірдей жолы болмады, деп жазады Egemen.kz.

Мәселен, Бейбіт Жұқаев пен Михаил Кукушкин алғашқы айналымдарда сүрінді. Тимофей Скатов пен Дмитрий Попко екінші кезеңде жеңілістің кермек дәмін татты. Финалға тек Александр Шевченко шықты. Жапониялық Шинтаро Мочизуки, франциялық Матис Эрарана және аустриялық Филип Мисоличтен айласын асырған ол жарыстың негізгі бөлігіне жолдама алды. Сөйтіп, Қазақстанның төрт ойыншысы Ролан Гарроста өнер көрсету құқығына ие болды.

Еліміздің ең үздік теннисшісі Елена Рыбакина тұсаукесер кездесуінде Белинда Беничичен ойнауға тиіс еді. Алайда Швейцарияның өкілі жарақатын желеу етіп, жарысқа қатысудан бас тартты. Оның орнын аргентиналық Хулия Риера басты. Отандасымыз WTA рейтингінде 204 орында тұрған ойыншыны 6:1, 4:6, 6:4 есебімен ұтты. Юлия Путинцева да іріктеу турнирінде топ жарған сол тағы бір өкілі Солано Сьерамен сайысқа түсті. Бұл тартыста отандасымыз жеңіске жетті – 6:1, 4:6, 6:4. Ерлер арасындағы Қазақстанның бірінші ракеткасы Александр Бублик АТР тізімінде 92 сатыға жайғасқан Жасыл құрлықтың өкілі Джеймс Даквортты еш қиналмай еңсерді. 6:2, 6:4, 6:4 Александр Шевченко сербиялық Душан Лайовичке сан соқтырды – 6:2, 6:4, 7:6.

Екінші кезеңде Рыбакина америкалық Ива Йовичті (6:3, 6:3), Путинцева тайпейлік Джоанна Гарлетті (7:6, 6:3) және Бублик аустралиялық Алекс де Минорды (2:6, 2:6, 6:4, 6:3, 6:2) жолда қалдырды. Ал Шевченко америкалық Итан Куиннің (4:6, 6:4, 7:6, 6:7, 5:7) осал тұсын таба алмады. Үшінші айналымда Елена (6:2, 6:2) өзімен аттас латвиялық Остапенконы ұтса, Александр португалиялық Энрике Рошаны (7:5, 6:1, 6:2) жеңді. Юлия ресейлік Мирра Андреевадан (3:6, 1:6) айласын асыра алмады. Төртінші кезеңде Рыбакина сүрінді. Жерлесіміз Инга Свентектің (6:1, 3:6, 5:7) осал тұсын таба алмады.

Төртінші кезеңде Александр Бублик әлемнің бесінші ракеткасы Джек Дрейпермен күш сынасты. Бұл бәсекені фавориті Ұлыбританияның ойыншысы екені анық еді. Себебі, ол АТР тізімінде отандасымыздан 57 саты жоғары тұр. Десек те, бұл кеште Александр өте тамаша ойнап, 5:7, 6:3, 6:2, 6:4 есебімен жеңіске жетті. Сөйтіп, ел теннисшілері арасында жарыс жолында жалғыз Бублик қана қалды. Ендігі бар үмітіміз – сол ойыншыда.

Естеріңізге сала кетейік, Үлкен дулыға» санатындағы бұл турнирдің жүлде қоры 56 352 000 еуроны құрап отыр. Яғни, Францияның бас шаһарындағы дүбірлі додада тәуір ойнаған теннисшілердің әлемдік рейтингте жоғарлап қана қоймай, материалдық тұрғыдан да мол олжаға кенелетіні анық. Мәселен, ерлер мен әйелдер арасындағы жекелеген сайыста бас жүлдені олжалаған теннисшілердің әрқайсына 2 550 000 еуродан табыс етіледі. Финалда ұтылғандар жоғарыда көрсетілген сомманың тең жартысын иеленеді. Жартылай финал мен ширек финалға шыққандар 690 000 пен 440 000 еуроны еншілейді. Екінші (265 000 еуро), үшінші (168 000 еуро) және төртінші (117 000 еуро) кезеңде ойнағандар да мол мөлшерде сыйақы алады. Тіптен, тұсаукесер кездесуде сүріңгендер де үйлеріне құр қол қайтпайды. Олардың әрқайсысына 78 000 еуродан тиесілі. Сол секілді жұптық және аралас жұптар арасындағы жарысқа қатысушыларға да едуәір көлемде сыйақы беру мәселесі қарастырылған.