ҰОК мәліметінше, бұл көпсалалы жарысты ұйымдастырушылар алғашқы күні қатысушыларға 7-21 қараша аралығында өтетін және 50-ден астам елдің спортшыларын жинайтын алдағы ойындарға дайындық барысы туралы толық ақпарат ұсынды.

Қазақстан Ұлттық Олимпиадалық комитетінің атынан іс-шараға бас директор Нұрлан Нөгербек пен Спорт департаментінің жетекші менеджері Айым Жетібаева қатысты. Семинар барысында тұрақтау, көлікпен қамтамасыз ету, логистика, аккредитация процесі, медициналық және допингке қарсы қолдау мәселелеріне ерекше назар аударылды. Сондай-ақ негізгі спорт нысандары мен Атлеттер қалашығына тур ұйымдастырылды.

Семинардың маңызды жаңалықтарының бірі ойындар бағдарламасына екі жаңа спорт түрінің — бокс пен дуатлонның енгізілуі болды.

Ресми бөлімнен бөлек, Қазақстан ҰОК өкілдері жұмыс кездесуін өткізіп, онда негізгі мерзімдер, делегация құрамы, тұрақтау, логистика, жүк пен спорттық жабдықты тасымалдауды рәсімдеу сияқты ұйымдастыруға байланысты мәселелерді талқылады

Мұндай семинарлар барлық логистиканы алдын ала реттеп, техникалық мәселелерді келісуге және спортшылар мен ресми тұлғалар үшін барынша жайлы жағдай жасалатынына көз жеткізуге мүмкіндік береді. Біз барлық қажетті ақпаратты алдық және нысандардың дайындық деңгейін көзімізбен көрдік. Олардың көпшілігі қазірдің өзінде аяқталу сатысында. Сондай-ақ атлеттерді орналастыру мәселесін талқыладық. Олар ханшайым Нура университетінің кампусында тұратын болады. Жалпы, біз барлық бағыт бойынша толыққанды ақпарат алдық", — деді Нұрлан Нөгербек.