Қостанай облысының Рудный қаласында лаңкестікке қарсы оқу-жаттығу өтті, деп хабарлайды 24kz.

«Найза-Антитеррор» республикалық жоспарлы іс-шарасына құқық қорғау органдары мен басқа да күштік құрылымдардың арнайы жасақтары қатысты. Бекітілген сценарий бойынша лаңкестер бейбіт тұрғындарды кепілге алып, екі ғимаратқа бекінген. Оқиға орнына тікұшақпен жеткен сарбаздар құтқару операциясын ойдағыдай өткізді. Жергілікті басқару органдары қатер төнген көрші үйлердің тұрғындарын қауіпсіз жерге орналастырып, төсек орын, тағаммен қамтамасыз етуге машықтанды. Енді мұндай оқу-жаттығулар облыстық, аудандық деңгейде өткізіледі.

Карина Базарбаева, Қостанай облыстық полиция департаментінің ресми өкілі:

- Оқу-жаттығудың негізгі мақсаты – террористік қатерлер туындаған жағдайда мемлекеттік органдардың әрекет ету және өзара іс-қимыл жасау дағдыларын жетілдіру, сондай-ақ терроризм актісінің салдарын барынша азайту және жою. Оқу-жаттығу аясында арнайы техника, құқық қорғау және арнайы органдардың және әртүрлі бөлімшелердің күштері мен құралдары жұмылдырылды.