Алаяқтықпен несие рәсімдейтіндермен күрес аясында дайындалған заң Сенатқа жетті. Қолданыстағы норма бойынша мұндай несиелер сот шешімімен ғана жойылатын.

Қаржы нарығын реттеу және дамыту агенттігі төрағасының орынбасары Олжас Қизатовтың айтуынша, алаяқтық жолмен алынған несиелерді енді банктер немесе микроқаржы ұйымдары сотқа дейін есептен шығаруға, яғни кешіруге міндетті.

Алайда азамат алаяқтық несиені төлеуді бастап кетсе немесе толық өтеп қойған болса, бұл қаражат қайтарылмайды. Ал алаяқтық жолмен алынған несие екенін қайдан біледі? Әбден ойланып, таразыға салмай немесе алаяқтықпен алынғалы тұрған несиені рәсімдетпеу үшін клиенттерге «салқын ақылға салу» уақыты — бір тәулік беріледі.

Сонымен бірге бірінші рет несие алғалы тұрған адам банкке немесе микроқаржы ұйымына өз аяғымен барып рәсімдеуі шарт. Егер осы ережелер сақталмай несие рәсімделсе, несиені банк не микроқаржы ұйымы кешіруі керек.

Алаяқтық схемаларының кесірінен мойнына несие ілінгендер көп. Кейбір дерек бойынша былтыр алаяқтар қазақстандықтардың атына 6 мыңнан аса несие рәсімдеген. Шығын 100 млрд теңге.