Күдіктіге өмір бойына дейін жаза қаупі бар.

Атырау облысында 40 жастағы Сұлтан Сәрсемалиевке қатысты сот процесі басталды. Ол бұрынғы жұбайының төрт туысын — ата-анасын, інісін және әпкесін өлтірді деп айыпталып отыр. Бұл туралы "Ақ Жайық" басылымы хабарлады.

Істі судья Зарема Хамидуллина қарап жатыр. Айыпталушыға қылмыстық кодекстің 99-бабы 2-бөлігі 1-тармағы — "Екі немесе одан да көп адамды өлтіру" бойынша негізгі айып тағылған.

Сонымен қатар оған бірнеше қосымша баптар да қарастырылған:

• 188-бап (ұрлық)
• 190-бап (алаяқтық)
• 384-бап (құжаттарды заңсыз иемдену).

Тергеу мәліметінше, бұл эпизодтар қаза тапқан отбасының мал-мүлкін сату және банк карталарындағы қаражатты иемденумен байланысты.

2026 жылғы 24 сәуірде Атырау облыстық прокуратурасы жүргізілген психологиялық-психиатриялық сараптама нәтижесінде Сәрсемалиевтің толық есі дұрыс деп танылғанын хабарлаған. Бұл оның қылмыстық жауапкершілікті толық көтере алатынын білдіреді. Аталған баптар бойынша оған өмір бойына бас бостандығынан айыру жазасы тағайындалуы мүмкін.

Тергеу деректеріне сәйкес, 2025 жылғы 25 желтоқсанда полицияға төрт адамнан тұратын отбасының жоғалғаны туралы хабар түскен. Кейін Атырау маңынан жоғалған туыстардың денелері табылған.

Бұған дейін күдікті тергеу барысында қаза тапқандардың жерленген орындарын көрсеткені айтылған. Алдын ала мәлімет бойынша, кейбір денелер шаруашылық құрылыстарынан және бұрын ол жалға алған үй маңынан табылған.

Оқи отырыңыз: Атыраудағы отбасының өлімі: күдіктіге қатысты сараптама қорытындысы жарияланды

Айыпталушының бұрынғы жұбайы Ақбаян Мұқанғалиева бұл іске күдікті ретінде тартылмаған. Алайда ол қылмыс туралы хабарламағаны үшін бөлек іс бойынша тергеліп жатыр. Оның әрекетіне құқықтық баға сараптама қорытындысынан кейін беріледі.