Гендерлік талдау нәтижесі бойынша да ерлер мен әйелдер арасында оң пікір білдірушілер саны жоғары.

ҚР Президенті жанындағы Қазақстан стратегиялық зерттеулер институтының (ҚСЗИ) тапсырысы бойынша 2026 жылдың сәуір айында жүргізілген әлеуметтік зерттеу нәтижесіне сәйкес, қазақстандықтардың басым бөлігі елдің қазіргі даму бағытын оң бағалайды, деп хабарлайды inbusiness.kz сайты.

Сауалнамаға қатысқандардың 84,4%-ы Қазақстан дұрыс бағытта дамып келе жатыр деп есептейді.

Зерттеу авторларының мәліметінше, өңірлік көрсеткіштер ел тұрғындарының пікірінде айтарлықтай айырмашылық жоқ екенін көрсеткен. Қала тұрғындарының 84%-ы елдің даму бағытын қолдаса, ауыл тұрғындары арасында бұл көрсеткіш 85,2%-ды құрады. Бұл халықтың тұрғылықты жеріне қарамастан қазіргі саясатқа деген көзқарасы ұқсас екенін аңғартады.

Гендерлік талдау нәтижесі бойынша да ерлер мен әйелдер арасында оң пікір білдірушілер саны жоғары. Әйелдердің 86,2%-ы елдің даму бағытын қолдайтынын айтқан. Бұл ерлер көрсеткішінен 4,3 пайыздық тармаққа жоғары.

Жас ерекшелігіне қарай ең жоғары қолдау жастар арасында тіркелді. Жастардың 89,3%-ы қазіргі бағытты оң бағалаған.

Сонымен қатар азаматтардың сатып алу қабілеті артқан сайын, елдегі саяси бағытқа деген оң көзқарас та күшейе түскені байқалған. Экономикалық жағдайының жақсарғанын сезінетін респонденттер бұл өзгерісті қазіргі саясатпен байланыстырады.

"Жалпы зерттеу нәтижелері қазақстандықтардың саяси бағытты негізінен оң бағалайтынын және бұл көзқарастың халықтың әлеуметтік-демографиялық ерекшеліктеріне қарамастан жоғары деңгейде сақталып отырғанын көрсетеді", – делінген хабарламада.

Әлеуметтік сауалнама ҚСЗИ тапсырысы бойынша 2026 жылғы 10 сәуір мен 10 мамыр аралығында жүргізілген. Зерттеуге 8 мың респондент қатысқан. Сауалнамаға 17 облыс пен республикалық маңызы бар Астана, Алматы және Шымкент қалаларындағы 18 жастан асқан азаматтар тартылды.