Қасым-Жомарт Тоқаевтың пікірінше, мәдени-гуманитарлық байланыстарды нығайту өңір елдері үшін негізгі басымдық саналады. Бұл туралы ол Орталық Азия мемлекеттері басшыларының VII Консультативтік кездесуінде айтты, — деп хабарлайды Massaget.kz тілшісі.

Мемлекет басшысы Өзбекстан президентін Самарқанд қаласында ЮНЕСКО-ның Бас конференциясын табысты өткізуімен құттықтады.

Президент ортақ тарихи-мәдени мұраны сақтаудың, ұлттық қолөнерді насихаттау және тұрақты түрде бірлескен іс-шаралар ұйымдастырудың маңызына назар аударды.

Кинематография саласында, сондай-ақ заманауи туристік кластерлер құру және жаңа технологияларды пайдалану арқылы Ұлы Жібек жолының мұрасын дәріптеуде біршама іс тындыруға болады.

"Осы салада барынша белсенді әрекет етіп, туризм саясатын өзара тиімді үйлестіретін уақыт жетті деп ойлаймын. Бұған дейін бүкіл өңірге ортақ туристік бағдарларды дамыту туралы ұсыныс айтылған еді. Біз мұндай бастамаларды қолдаймыз. Бұдан бөлек, Орталық Азияның біртұтас туристік брендін ілгерілетуде пәрменді шаралар қабылдауды ұсынамыз. Туризм саласындағы ынтымақтастық туралы келісім және Орталық Азия елдерінің бірыңғай туристік кеңістігін қалыптастыру аталған саладағы байланыстарымызды жандандыруға құқықтық негіз бола алады", – деді Президент.

Қасым-Жомарт Тоқаев Ташкенттегі Ислам өркениеті орталығынан алған әсерімен бөлісіп, Шавкат Мирзиёевтің бұл мекемені ғылыми-зерттеу жұмыстары жүргізілетін ортақ алаңға айналдыру жөніндегі бастамасын қолдады.

Контекст

14 қарашада Қазақстан Президенті Қасым-Жомарт Тоқаев Өзбекстан көшбасшысының шақыруымен мемлекеттік сапармен Ташкентке барды. Мемлекет басшылары кеңейтілген құрамда және бетпе-бет форматында келіссөздер жүргізді, Қазақстан мен Өзбекстанның Жоғары мемлекетаралық кеңесінің отырысына қатысты, сондай-ақ құны 1,2 миллиард доллар болатын жеті бірлескен жобаны іске қосты.

15 қарашада Қазақстан, Өзбекстан, Әзербайжан, Қырғызстан және Тәжікстан президенттері Ташкенттегі Ислам өркениеті орталығына барды. Орталықтың мақсаты – Өзбекстанның бай мәдени және рухани мұрасын әлемдік ислам өркениетінің ажырамас бөлігі ретінде сақтау, терең зерттеу және кеңінен таныту.

Сондай-ақ Мирзиёев Тоқаевты Өзбекстанның ең жоғары мемлекеттік наградасы – "Олий Даражали Дустлик" ("Жоғары дәрежелі Достық") орденімен марапаттады.

Өзекті жаңалықтарды өз уақытында оқу үшін Facebook парақшамызға жазылыңыз!