Талдықорғанда республика күніне орай ауылшаруашылық өнімдерінің жәрмеңкесі өтті.
Оған Жетісу облысының аудан-қалаларынан келген тауар өндірушілер қатысып, қала тұрғындарына 136 тонна ет, сүт, қант, картоп сынды азық-түлік түрлерін ұсынды.
«Жастар» спорт сарайының маңы бүгін үлкен сауда-саттық алаңына айналды. Күзгі жәрмеңкеге жиналған көпшілік балғын өнімдерді делдалсыз тікелей тауар өндірушіден сатып алды.
Кәкиләт Әділқызы, Талдықорған қаласының тұрғыны:
- Біраз төмендеу екен. Көшеде келісі 190 теңге картөшкенің. Мына жерде 160-тан беріп жатыр. Нормальный болады екен. Жәрмеңке деген жақсы ғой.
Айымгүл Құсайынбекқызы, Талдықорған қаласының тұрғыны:
- Құрт алдым, май алдым. Кәртөшке алдым Қоғалының. Мәгәзинде 4800 ғой ет. Мына жерде 3 мыңнан қойдың етін алдым. Ризамыз.
Аудан-қалаларда кәсібін дөңгелетіп отырған шаруалар облыс орталығына көбіне келе бермейді. Себебі жол шалғай. Бүгінгі жәрмеңкеге арнайы шақыртылған олар азық-түліктің 50-ден аса түрін жеткізіп, өз өнімін саудалады.
Михаил Сюра, омарташы:
- 20 жылдан бері омарташылықпен айналысамыз. Бүгін алғаш рет жәрмеңкеге қатысып тұрмыз. Өзімізбен бірге балдан жасалатын жеті түрлі өнім алып келдік.
Торғын Әбдіқадырова, шаруашылық жетекшісі:
- Көпбірлік жақтың балығы бұл. Бүгін жәрмеңке дегеннен кейін әкім жәрмеңкеге алып келді. Балықпен көп болды айналысқанымызға. Балықтың түр түрі бар. бүгін арзандау болып тұр балықтың бағалары.
Бұл облыстық деңгейде өткен алғашқы күзгі жәрмеңке. Мереке қарсаңында ұйымдастырылғандықтан ауқымы да үлкен.
Данияр Ысқақ, облыстық ауыл шаруашылығы басқармасы басшысының орынбасары:
- Жәрмеңкеге 136 тонна түрлі азық-түлік түрлері алып келінді. Азық-түлік тауарларының жалпы сомасы 128 млн теңгені құрайды.
Мұндай шара облыс орталығында қара күзге дейін жалғасады. Сала қызметкерлері келесі жәрмеңкені қараша айының басында өткізуді жоспарлап отыр.
Шыңғыс Қалиден, Жеңіс Әбдірешов
