Премьер-министр Олжас Бектенов «Самұрық-Қазына» акционерлік қоғамының директорлар кеңесін өткізді. Жиынға алғаш рет жасанды интеллект негізінде құрылған тәуелсіз цифрлық мүше SKAI (Samruk-Kazyna Artificial Intelligence) қатысты, деп хабарлайды Egemen .kz.

Айта кетейік, Қазақстандық Alem LLM тілдік моделі негізінде құрылған бұл нейрондық желі бұған дейін Digital Bridge 2025 халықаралық форумы аясында Мемлекет басшысына таныстырылған болатын.

Отырыста қордың 2025 жылдың алғашқы тоғыз айындағы қызметінің қорытындылары қаралды. Президент тапсырмаларының орындалу барысына, әсіресе ірі инфрақұрылымдық жобалардың жүзеге асырылуына ерекше назар аударылды.

Қордың есебі бойынша, биыл Жамбыл облысында жел энергиясына арналған компоненттер шығаратын зауыт іске қосылып, Жаңаөзенде қуаты 50 мегаватт күн электр стансасы пайдалануға берілді. Сондай-ақ Қосшы қаласына газ жеткізуге арналған алғашқы кешен ашылып, «Достық – Мойынты» теміржол учаскесіндегі екінші жол пайдалануға берілді. Бұған қоса, ұзындығы 302 шақырым болатын «Талдықорған – Үшарал» магистральды газ құбыры іске қосылды. Бұл жобалар елдің көлік, энергетика және цифрландыру салаларындағы әлеуетін арттыруға бағытталған.

Қор басқарма төрағасы Нұрлан Жақыпов қаржылық және өндірістік көрсеткіштердің тұрақты оң динамикада екенін атап өтті. Ірі инвестициялық жобалар бойынша қаражатты игеру деңгейі 99 пайызға жеткен.

Премьер-министр кеңес мүшелерінің назарын отандық тауар өндірушілерді қолдау мәселесіне аударды. Цифрлық кеңесші SKAI ұсынған деректерге сәйкес, биыл қазақстандық өндірушілерден сатып алынған тауар көлемі өткен жылмен салыстырғанда 75 пайызға өсіп, 721 миллиард теңгеге жеткен. Барлығы 497 отандық кәсіпорынмен 7 227 келісімшарт жасалған. SKAI-дың бағалауы бойынша, биылғы сатып алу жоспары Wabtec компаниясына тиесілі жергілікті өндірушіден локомотивтер алу арқылы айтарлықтай асыра орындалады.

Кеңес барысында «Таза Қазақстан» экологиялық бастамасының жүзеге асырылуы да талқыланды. Бұл жоба аясында қор компанияларының қызметкерлері шамамен 1 миллион ағаш отырғызуды жоспарлап отыр. Сонымен қатар, инклюзия, спорт және медицина бағыттарындағы әлеуметтік жобалар да қарастырылды. Қазіргі таңда 87 нысанда 700 мыңнан астам азаматқа әлеуметтік қызмет көрсетілуде, ал жыл соңына дейін Маңғыстау мен Батыс Қазақстан облыстарында жаңа спорт кешендері ашылады.

Жиын қорытындысы бойынша қор басшылығына инфрақұрылымдық жобаларды уақытылы аяқтау және отандық өндірушілерді қолдауды күшейту тапсырылды. Сондай-ақ тауарлар мен қызметтерді сатып алуда қазақстандық қамту үлесін ұлғайту міндеті қойылды.