Алматы облысының Балқаш ауданында күріш орағы қызу жүріп жатыр. Алайда шаруаларға жауын-шашын мен күріш алқаптарына мал кіріп кетуі айтарлықтай кедергі келтіруде.

«Ауа райы қолайлы болса, қарашаның қара суығына ұрынбай, биылғы мол өнімді қамбаға құйып аламыз», — дейді жергілікті диқандар.

Балқаш ауданының шаруалары биыл 7700 гектар алқапқа күріш екті. Ауданда осы дақыл түрін өсірумен айналысатын 34 шаруа қожалығы бар. Олар қазір барлық егіс алқабының 60 пайызын орып бітті.

Әбіш Бірлікбаев басқаратын шаруашылық 1200 гектар алқапқа күріш еккен. Балқаш ауданының шаруалары орта есеппен әр гектардан 42 центнерден өнім алуда. Дегенмен ауа райының қолайсыздығы күріш орағына айтарлықтай кедергі келтірді.

Әбіш Бірлікбаев, шаруашылық бригадирі:

- Қазір 65 гектар жерімізді түгелдей, жаппай бітірдік. Жақсы өнім беріп жатыр. Қазір 60 центнердің үстінде айналып жатыр. Өткен жолы жаңбыр көп кедергілер келтірді. Екі-үш күндей уақытымызды ұстап қалды. Орып қойған өнім уақытында кеппеді. Кішкене кешігіңкіреп қалдық.

«Мал жайлаудан түскен мезгіл болғандықтан, күріштікке кіріп кетеді. Сондықтан шабылған алқаптарымызды күріш толық бастырылып біткенше қоруға тура келіп тұр. Мал өте көп, күрішімізді жеп кетіп жатыр», — дейді жергілікті шаруалар. Балқаш ауданында 28 мың гектар суармалы алқап бар.

Азат Құтпанбетов, Балқаш ауданының әкімі:

- Жалпы 28 мың гектар алқаптың 7700 гектары бізде күріш алқаптары. Бүгінгі таңда күріш ору науқаны қарқынды жүруде. Қазіргі кезде 4500 га жер орылып, 3000 га жер бастырылды. Бүгінгі күнге 12 мың тонна осы күріш өнімі жиналды.

Балқаш ауданы бойынша көктемгі дала жұмыстарына 409 тонна дизель отыны бөлінсе, шаруашылықтар жазғы және күзгі жиын-терім үшін 143 тонна жанар-жағармайды жеңілдетілген бағамен алды. Биыл су жеткілікті болды. Жаз бойы Қапшағай су қоймасынан Ілеге секундына 750 текше метр су жіберілді. Жасанды көлге су жинау мақсатында қазір бұл көлем үш есеге дейін азайды.

Авторлары: Ардақ Айбарұлы, Аят Дүйсенбаев, Аманжол Жөңкешов