Сталинград шайқасында Батыс Қазақстанның жау бетін қайтарудағы орны ерек. Бірақ облыстың майдан тылы болғандығы әлі күнге толық мойындалмай келеді. Ендігі мақсат – осы ұғымды ғылыми айналымға енгізу. Мәселе елордадағы әскери-тарихи музейде талқыланды.

Генералдар кеңесінің ұйымдастыруымен республикалық ғылыми-практикалық конференция өтті. Өзектілігі мынада –1942-1943 жылдардағы Сталинград түбіндегі ұрыс екінші дүниежүзілік соғыстың тағдырын шешті. Жау қарсыласын қирата жеңу үшін жанармайдан ажыратуды ойластырып, Кавказдағы мұнай қорларын көздеген. Фашистер дегеніне жетіп, Грозный, Майкоп, Краснодар және Дондағы Ростов қалаларының кен орындарын басып алды. Осылайша Баку мұнайына да тосқауыл қойды. Бұндай қауіп Батыс Қазақстанға да төніп тұрған еді.

Асқар Мұстабеков, ҚР Ұлттық қорғаныс университетінің басшысы:

- Фашистік Германия жоспары бойынша БҚО Орал қаласын басып алып, мұнаймен фронтты қамтамасыз ететін бағытты бақылауға алу деген өзінің бір жоспары болған. Сталинград фронтының 120-дан артық бөлімшелері сол жерде орналасқан. Фашистердің әуе қорғаныс күштері БҚО-да 700 ден аса шабуыл жасап, бомбалаған болатын.

Сөйтіп, Сталинград шайқасында Батыс Қазақстан майдан тылына айналды. 7 ай бойы қарсылық танытты. Мемлекеттік қорғаныс комитетінің бөлімшелері құрылып, оқшаулау орындары, дала емханалары жұмыс істеді. госпитальдар жұмыс істеді. Атырау мен Оралда әскери жағдай енгізілген. Жәнібек, Сайқын және Шоңғай бекеттері фашист әуе күштерінің жүйелі шабуылына ұшырап, барлау-диверсиялық топтары толастамады. Жоғарыда аталғандармен қатар Сталинградқа жеткізетін жалғыз теміржол сол аймақта ғана аман қалған. «Майдан тылы ретінде танылуы үшін осы айғақтар жеткілікті», — дейді зерттеушілер.