Израильдің шабуылы Қатардың егемендігі мен аумақтық тұтастығына қол сұғумен тең. Сондай-ақ бұл – бейбіт дипломатияға жасалған ауыр соққы. Түркия Вице-президенті Жевдет Йылмаз әлеуметтік желідегі парақшасында осылай деп мәлімдеді.

Оның айтуынша, Қатар әрдайым бейбіт шешім мен дипломатияға басымдық беріп келеді. Ал аймақтық тұрақтылыққа қатер төндірген Израильдің әрекетіне қатысты халықаралық ұйымдар нақты ұстаным танытуға тиіс.

Жевдет Йылмаз, Түркия вице-президенті:

- Израильдің бұл шабуылы – халықаралық құқықты ашықтан-ашық бұзу. Біз бейбіт жолды ұстанатын бауырлас Қатардың қауіпсіздігіне алаңдаймыз. Сондай-ақ бұл әрекетті қатаң айыптаймыз.

Ал Түркия Сыртқы істер министрлігі Израильдің шабуылын «қорқақ әрі қастандық әрекет» деп бағалады. Министрліктің мәлімдемесіне сәйкес бұл – Қатардың егемендігіне қол сұғу әрі халықаралық құқық нормаларын өрескел бұзу. Сондай-ақ Анкараның бауырлас Қатармен бірге екенін жазып, халықаралық ұйымдарды Израильдің агрессивті саясатына қарсы нақты қадам жасауға шақырды.

Түркия Сыртқы істер министрлігі:

- Израиль осы шабуылы арқылы бітім келіссөздерінде делдал болған Қатарды соққының нысанасына айналдырды. Бұл – оның лаңкестік әрекетті мемлекеттік саясат ретінде қабылдауының айқын дәлелі. Сол себепті біз Қатардың егемендігі мен қауіпсіздігін нысанаға алған бұл арсыз шабуылға қарсы тұрамыз.