Алдағы екі жылды айттық, ал одан арғы екі жылда , жасанды интеллектінің ақылы адамнан аспаса, кем түспеуі мүмкін. Ертең әлдебір робот өзіңмен сөз таластырып, болмаса айтқаныңды істемей жатса, еш таңқалуға болмайды.

Бұған дейін сурет салып, өлең жазған жасанды интеллектіге таң қалсақ, енді бұл жүйе өзіңнің ойыңды оқып, қимылыңды бағып отыруы мүмкін.

Осыған қарағанда бұл жүйе адамның орнын алмастыра алмайды деген пікір жаңсақ тәрізді. Ал технология әлемі көз іліспес қарқынмен дамып келеді. Білетініміз біршама, білмейтініміз қанша? Бұл салаға бойлаған қазіргі мамандар не дейді?

AGI келе жатыр

Жасанды интеллект саласындағы кей сарапшылар 2029 жылға қарай ақылы адамнан кем түспейтін жасанды сана агенті пайда болады деп болжайды. Яғни AI-дан AGI-ға қадам басу. Бұл екеуінің айырмашылығы неде? Айталық: Қазіргі ЖИ (AI) модельдері тек бір салада ғана жұмыс істейді. ChatGPT мәтіндік үлгілер жасайды, ғажап бейнелер, суреттер жасауға арналған, Wix сияқты компаниялар ЖИ-ді веб-дизайн үшін пайдаланады. Ал Жалпы мақсаттағы жасанды интеллект (AGI) – бұл адам сияқты бәрін жасай алатын гипотетикалық бағдарлама. Ол жаңа дағдылар мен жағдайларға бейімделіп, адамның қатысуынсыз өз бетінше үйрене алады және адам санасын түсінеді.

Рэймонд Курцвейл, америкалық өнертапқыш, жасанды интеллект саласындағы ғалым:

- Қазірде көптеген жасанды интеллект (AI) белгілі бір тапсырма үшін жасалған. Ал жалпы жасанды интеллект (AGI) – когнитивті тапсырмалардың кең ауқымын адам сияқты орындай алатын немесе адамнан да асып түсетін жүйе. Жасанды интеллект саласында нанотехнология адам миын компьютерлермен байланыстыру, олардың арасында үздіксіз интерфейс құру мәселесі маңызды рөл атқарады.

Супер интеллект қабілеті

Алайда AGI жасанды интеллект қабілетінің шегі емес. Одан кейінгі саты ASI болмақ. Бұл суперинтеллект. Ғылыми фантастика десем де болады.

Адам қолынан келетін барлық мүмкіндіктерді атқара алатын, шексіз қабілетке ие интеллект. Ол өздігінен шешім қабылдай алады, өнер туындыларын жасауға атсалысады. Сондай-ақ эмоционалды деңгейде адаммен қарым-қатынас құра алады.

Жасанды интеллектке негізделген бағдарламалар мен жобалардың әлемдік нарығы жыл сайын 28%-ға өсіп отыр. Германияның Statista аналитикалық компаниясының болжамына сенсек, ғасыр ортасына қарай бұл көрсеткіш 57%-ға жетуі мүмкін. AI технологияларын дамыту бойынша әлемде көшбасшы — АҚШ. Жасанды интеллекті дамытуға салынған инвестициялардың ең көп көлемі осы елге тиесілі. Былтырғы жылдың қорытындысы бойынша бұл сома 328 миллиард доллардан асты. АҚШ мұндай жетістікке, ірі компаниялардың, Google, Facebook, Amazon және Microsoft-тың арқасында қол жеткізді. Іздеу жүйелері, ұсыныс алгоритмдерінен бастап автономды көлік құралдары мен медициналық технологияларға дейінгі көптеген өнімдер қолданысқа енді.

Жасанды нейрондық желілер әуелде бөлшектер физикасы, материалтану және астрофизика сияқты физиканың әртүрлі салаларында зерттеулерді жетілдіру үшін пайдаланылды. Алайда, қазіргі заманда күнделікті өмірімізге еніп кеткені соншалық, қарапайым бет-әлпетті тану қызметінен бастап кез келген салада кездестіруге болады.

Адамды компьютер басқарады

Болашақта адамды компюьтер басқарады. Мұны айтқан Илон Маск. Технология саласына тың серпін беретін бірден-бір бастамалардың жетекшісі бола тұра, америкалық миллиардер жасанды интеллектінің даму қарқынына алаңдаулы. Жер бетіндегі күллі тіршілік атаулының ішінде ақыл, ой, сана, ес тек адамға ғана берілген қасиет екенін ескерсек, жасанды интеллектінің адамнан асып түсуі технологияның шектен асқанын білдіреді. Жасанды интеллектінің атасы Джеффри Хинтонның өзі ақылды зердені бақыламаса, оның «жолбарысқа» айналуы мүмкін екенін ескерткен еді. Ол алдағы онжылдықта ЖИ адамзатқа қауіп төндіруі ықтимал екенін ашық айтты. Бұл мәлімдемеден кейін бірқатар мемлекеттегі көптеген зерттеушілер мен технологиялық компаниялар этика мен қауіпсіздік мәселесін қайта қарады.

Джеффри Хинтон, жасанды интеллект бойынша Нобель сыйлығының иегері:

- Жасанды интеллект әлеуетін өнеркәсіптік революциямен салыстыруға болады. Физикалық тұрғыдан адаммен бәсекеге түсе алмаса, алайда интеллектуалды қабілеті арқылы талайды ығыстыруға қақуқарлы. Басты қауіп те осы.

Жасанды интеллект игілігін көру үшін бұл саладағы бастамалар ізгілікке ғана бағытталуға тиіс. Көптеген зерттеушінің ортақ пікірі осыған саяды. Технологиялық тартыс жүріп жатқан заманда, жаһан жұрты жарысамыз деп жүріп жасанды интеллектіні бақылаудан шығарып алмауы маңызды. Әйтпесе Джеффри Хинтон айтпақшы, қолға үйретілмеген жыртқыш жолбарыс секілді адамға тап бермесіне ешкім кепілдік бермейді.