Бұдан былай Қазақстанда ЛГБТ-ны ашық насихаттаған кез келген адам әкімшілік жауапкершілікке тартылуы мүмкін.

Бұл бастама туралы бүгін Парламенттің бірлескен отырысынан кейін мәжілісмен Еділ Жаңбыршин айтты. Депутаттар тағы қандай бастамаларды ұсынды? Қандай салаларды өзгеріс күтіп тұр?

Қазақстанда ЛГБТ-ның ашық насихаты бар. Әсіресе әлеуметтік желіде байқалады, дейді Мәжіліс депутаты Еділ Жаңбыршин. Осыған байланысты алдағы уақытта бұл үдерісті шектейтін тиісті заң қабылдануы мүмкін.

Еділ Жаңбыршин, ҚР Парламенті Мәжілісінің депутаты:

- Әзірше заң дайындық үстінде. Жалпы ең бастысы сол насихатты ашық түрде жариялауды шектеу. Егер де ол заң бұзушылыққа жол беретін болса, әкімшілік-құқықтық жауапкершілігін қарастырылады. Мен түсінемін, егер де өзіңіздің жеке басыңыздың мәселесі болатын болса, оны өзіңіз ешқандай қоғамға жария етпей, өз бағытыңызды жүруіңіз керек деп ойлаймын. Ал егер де сіз өзіңіздің сондай өкілі екеніңізді, сондай бағытта екеніңізді БАҚ-ты немесе әлеуметтік желіні пайдаланып жариялау үгіт-насихат деп есептеймін.

Ата-аналар мен ұстаздар қауымы бала тәрбиесімен ұдайы айналысып, олардың қандай ақпарат алып жатқанын үнемі біліп отыруы керек. Мектептерде тәрбие сағаты жиі өткізіліп, білім беру саласының өкілдері, педагогтар мен психологтар қажетті бағдарламалық стандарттар енгізуі тиіс, дейді мәжілісмен.

Еділ Жаңбыршин, ҚР Парламенті Мәжілісінің депутаты:

- Шетелдің де зерттеулері көрсетіп отыр, жалпы осы қауымдастық өкілдері көбінесе суицидке барады. Және үлкен психологиялық дағдарысқа ұшырайтынын көрсетеді. Сондықтан біз ол насихатқа қарсымыз. Және мұны заңмен бекітуіміз керек.

Сапалы дәрі-дәрмек тапшылығымен күрес

Медицина, нақтырақ айтсақ, фармация тақырыбына ойыссақ. Депутат Асхат Аймағамбетов жаз айларында өңірлерді аралаған кезінде халықтың көтерген негізгі мәселелерінің ішінде дәрі-дәрмектің қолжетімсіздігі болғанын айтты.

Асхат Аймағамбетов, ҚР Парламенті Мәжілісінің депутаты:

- Дәрі-дәрмектің біздің азаматтарымызға қолжетімді болуы. Оның сапасы дұрыс жоғары болуы. Оған бақылау жүргізуі және де бізге керек дәрі-дәрмектер Қазақстанда болуы. 1-2 айда әлемде қолданылатын мықты дәрілер Қазақстанға да келуі керек. Міне осы сияқты маңызды бастамалар бар.

Маңызды бастамалардың қатарына депутат Бақытжан Базарбек заңсыз құрылысты тыю ұсынысын да қосты. Үш жылдан астам уақыт бойы сүрілмей жыр болған ғимараттарды үш айдың ішінде жермен жексен қылу керек, дейді мәжілісмен.

Бақытжан Базарбек, ҚР Парламенті Мәжілісінің депутаты:

- Сүруден қорықпауымыз керек. Біз сүру десе қорқамыз, қаншама адам далада қалып қалады. Қытайда ондай құрылыстар күн сайын сүріледі. Содан кейін құрылыс компания иелерін тізім бойынша қылмыстық жауапкершілікке тарту керек. Және заңсыз құрылыстарға рұқсат берген әкімдік лауазымды тұлғалары, жер қатынастары басқармасы, сәулет және қала құрылысы басқармаларының басшылары, әкім, әкім орынбасарларының бәрі қылмыстық жауапкершілікке тартылу керек. Міне әділдік деген осы.

АӨК: субсидиялау саясаты өзгере ме?

Сонымен қатар Бақытжан Базарбек ауыл шаруашылығын субсидиялау саясатын өзгерту қажет дегенді тілге тиек етті. Оның сөзіне сүйенсек, отандық салада 12 ірі кәсіпорын бар. Мемлекеттен берілетін субсидияның 60 пайызы тек сол санаулы компанияларға бұйырып отыр. Көмекқаржының 40 пайызы қалған ұсақ шаруа қожалықтарына жетпейді. Салдарынан жергілікті агроөнеркәсіп кешені түгелдей зардап шегеді, дейді депутат. Осы және басқа да бастамалар алдағы сессияда қаралады.

Мирлан Алтынбек, Самат Қазанбаев, Жанаман Ерғалиев