Алматыда интернет-алаяқтыққа арналған SIM-карталарды іске қосу схемасы әшкере болды, деп хабарлайды 24kz.
Құқық қорғау органдары жедел-іздестіру барысында мессенджерлердегі аккаунттарды тіркеу және оларды үшінші тұлғаларға тапсыру үшін пайдаланылған SIM-карталар мен мобильді құрылғыларды жаппай сатып алған әйелді ұстады.
Ұсталған әйел «жеңіл табыс» туралы хабарламаға жауап беріп, сыйақы үшін жүздеген абоненттік нөмірді өз атына рәсімдегенін мойындады. Дәл осы нөмірлер арқылы бірнеше қылмыстық істерге қатысы бар қоңыраулар жасалғаны анықталды. Күдіктілер өзін мемлекеттік орган немесе банк қызметкері ретінде таныстырып, азаматтарды алдаған.
