2025 жылғы қазанда әлеуметтік желілерде зәулім ғимараттың төбесіндегі футуристік стадион жобасы бейнеленген видео кең тарады. "Проверено" видеоның рас-өтірігін тексерді, — деп хабарлайды Massaget.kz тілшісі Factcheck.kz-ке сілтеме жасап.
Жазба авторлары нысанның атауы Neom болатынын, оның 2032 жылы ашылатынын және екі жылдан кейін футболдан әлем чемпионатының бірнеше ойыны сонда өтетінін айтады. Видеода биік ғимараттың үшөлшемді анимациясы көрсетілген. Ғимарат жоғары қарай кеңейіп, төбесінде стадион орналасқан. Бұл видеоны Insider UA, "Правдивости" Telegram-арналары, сондай-ақ Facebook пен Instagram қолданушылары жариялаған. Мұндай құрылыс жөнінде ТАСС агенттігі де Gulf News мақаласына сілтеме жасап жазды.
2024 жылы Сауд Арабиясы 2034 жылғы футболдан әлем чемпионатын өткізетін ел ретінде таңдалды. Дегенмен бүгінде елде FIFA стандарттарына толық сай келетін екі стадион ғана бар. Өз өтінімінде Сауд Арабиясы турнир басталғанға дейін мұндай нысандардың санын 15-ке жеткізуге уәде берген.
Зәулім стадион салу жобасы расымен де бар. Оны елдің солтүстік-батысында, Қызыл теңіздің жағалауында салынып жатқан футуристік Neom мегаполисінде тұрғызу жоспарланған. "Neom стадионы – озық инновациялардың көрінісі, әлемдегі ең ерекше нысандардың бірі болады. Ол Сауд Арабиясының кәсіби футбол командасының өз алаңына айналады", — делінген корольдіктің чемпионатты өткізуге арналған ресми өтінімінде.
Осы құжатта жоба туралы нақты мәліметтер де берілген. Стадион Neom мегаполисінің құрамына кіретін ерекше сызық пішінді қала — The Line аумағында салынады. Бұл қаланың ұзындығы 170 шақырым, ені 200 метр, ал биіктігі 500 метр болады.
"Neom-дағы әлем чемпионатына арналған барлық іс-шара The Line бірінші ауданында өтеді. Ол жарыс басталғанға дейін толық дайын болады. Әлемдегі ең ірі жасанды мариналардың бірінде орналасқан бұл аймаққа стадион, Fan Festival FIFA алаңы және турнирге қатысты басқа да нысандар кіреді", — делінген өтінімде.
Әлеуметтік желідегі жазбаларда айтылғандай, 46 мың көрерменге арналған арена жер бетінен 350 метр биіктікте орналасып, толықтай жел және күн энергиясымен жұмыс істемек.
Жобаның визуализациясы ресми өтінімде және Neom компаниясының X (бұрынғы Twitter) желісіндегі расталған парақшасында жарияланған. Ал әлеуметтік желілерде тараған видео ресми жобаға мүлде ұқсамайды.
Қазанның басында желіде осы стадионның тағы бір ойдан шығарылған нұсқасының видеосы тараған. Онда нысан биік ғимараттың төбесінде, әлдеқайда қарапайым көріністе орналасқан. Алайда ол видео аса әсерлі болмады.
Қорытындылай келе, Сауд Арабиясында расымен 350 метр биіктікте орналасатын стадион салу жоспары бар. Бірақ әлеуметтік желіде тараған бейнеролик — ойдан шығарылған визуализация ғана.
Қызықты жаңалықтар мен видеоларды көру үшін TikTok арнамызға жазылыңыз!
