Қазан айының соңғы жексенбісінде еліміздің көлік инфрақұрылымын дамытуға үлес қосып жүрген автожол саласы қызметкерлері ұлықталады, деп хабарлайды NUR.KZ порталы.

Бұл күн – жолшы инженерлердің, құрылысшылардың, механиктердің, зертхана мамандары мен операторлардың еңбегіне құрмет көрсететін мереке. Олар – ел жолдарының үздіксіз қозғалысы мен дамуын қамтамасыз етіп жүрген азаматтар.

Қазір жол саласын технологиясыз елестету мүмкін емес. Бұл бағытта Қазақстан сенімді қадам басып, алға жылжып келеді. Соның ішінде Қазақстан Көлік министрлігінің Автомобиль жолдары комитетіне қарасты "Жол активтері сапасының ұлттық орталығы" республикалық мемлекеттік кәсіпорны жүзеге асырып жатқан цифрлық жаңғыру саланың дамуына жаңа серпін беріп отыр.

Бүкіл елді қамтитын бақылау

Қазақстанның автожол желісі 185 мың шақырымды құрайды. Әрбір жол бөлігі – тұрақты бақылауды, сараптауды және қолдауды қажет етеді. Осы міндетті "Жол активтері сапасының ұлттық орталығы" атқарып келеді. Орталық жол желісінің барлық бөлігін сапа сараптамасымен қамтиды.

Бүгінде орталықтың еліміздің барлық өңірінде 20 филиалы жұмыс істейді. Жыл сайын 20 мың шақырымнан астам жолға диагностика жүргізіліп, орташа жөндеу жобаларына 5,5 мыңнан астам ведомстволық сараптама жасалады. Зертханаларда жол-құрылыс материалдары мен жұмыстардың сапасына қатысты 217 түрлі сынақ түрі өткізіледі.

Сала тірегі – цифрлық шешімдер

"Жол активтері сапасы ұлттық орталығының" басты мақсаттарының бірі – сапаны басқару жүйесіне цифрлық технологияларды енгізу. Бұл қадам жол саласындағы жұмыс тәсілін түбегейлі өзгертті. Қазір Орталық Азия елдерінде баламасы жоқ бірегей IT-жобаларды жүзеге асырып отыр:

• KazRoadLab – бірыңғай цифрлық сараптама платформасы. Барлық зертханалық сынақ нәтижелері электронды дерекқорда сақталып, онлайн режимде қолжетімді.

• Сынамаларды штрихкодтау жүйесі – адами факторды болдырмай, зертханалық талдауларды бейтарап әрі дәл жүргізуге мүмкіндік береді.

• Smart Road Diagnostic System (SRDS) – жасанды интеллектке негізделген жүйе. Ол жол жабынындағы ақауларды анықтап, диагностика процесін халықаралық стандарт деңгейінде автоматтандырады.

• KazRoad VR – мамандарды өндірістен қол үзбей, қауіпсіз цифрлық ортада оқытуға арналған виртуалды тренажер.

• КИД KRL – жобаның барлық кезеңінде ашықтықты қамтамасыз ететін атқарушы құжаттаманы автоматтандыру жүйесі.

Ашықтық пен сенім – басты қағидаттар

Бұл шешімдер тек сапаны арттыруды емес, сонымен қатар сыбайлас жемқорлық тәуекелдерін азайтуды көздейді. Цифрлық құралдарды пайдалану процестің әр кезеңінде – сынама алудан бастап қорытынды жасауға дейін барынша ашық бақылауды қамтамасыз етеді.

Құрылған цифрлық экожүйе жол құрылысы мен жөндеуінің бүкіл процесін қамтиды. Соның арқасында салада шешімдер нақты, жедел және әділ қабылданады.

Сапа – жауапкершілік

"Жол активтері сапасының ұлттық орталығы" атқарып жатқан жұмыс көп жағдайда көзге көрінбеуі мүмкін. Бірақ оның нәтижесі миллиондаған адамның қауіпсіздігіне тікелей әсер етеді. Өлшеулердің дәлдігі, материал сапасын талдау мен сараптаманың сенімділігі – азаматтар, жүк көліктері мен қызметтік машиналар күн сайын жүріп өтетін жолдардың жағдайын айқындайды.

Автожол саласы қызметкерлерінің күні – құрылысшылармен бірге сапаны қадағалап жүрген инженерлердің, лаборанттардың және цифрлық мамандардың еңбегін ерекше атап өтетін күн. Олардың еңбегі – елдің жолына деген сенімнің тірегі.

Ел игілігі жолындағы еңбек

Жол саласын цифрлық жаңғырту – "Жол активтері сапасының ұлттық орталығы" мамандарының бүгіннен бастап қалыптастырып жатқан шынайы еңбегінің жемісі. Орталық жаңа технологияларды жетілдіріп, платформалардың мүмкіндігін кеңейтіп, жас мамандарды даярлау бағытында үздіксіз жұмыс істеп келеді.

Әр шақырым жол тек төселіп қана қоймай, сапа тұрғысынан тексерілуге тиіс. Дәл осы міндетті "Жол активтері сапасының ұлттық орталығы" атқарып отыр.

"Жол активтері сапасының ұлттық орталығы" барша саланың мамандарын кәсіби мерекемен шын жүректен құттықтайды! Жолдарымыз әрдайым тегіс, еңбегіміздің бағасы жоғары болсын!

Мәтіннен қате тапсаңыз, бізге жазыңыз