Мәжіліс депутаты Айдос Сарым қоғамда жалған ілімдер мен курстар кең тарап жатқанын сынады, — деп хабарлайды Massaget .kz тілшісі.

"Кейінгі уақытта елімізде кеңінен таралып кеткен сан алуан эзотерикалық, псевдопсихологиялық жалған ілімдер мен секталардың әсіре белсенділігі қатты алаңдатып отыр. Өздеріне жалған диплом жасатып, атағы жер жаратын "академиялардың", әлемдік "ұйымдардың" атынан сөз сөйлеп жүрген бақсы-құшнаштың, тренер-коучтердің шаралары саны күн санап артып барады. Қай бір сайтты, әлеуметтік желіні ашып қалсаң болды, әлемнің барша құпиясын меңгерген, адамның жан дүниесінің бүкіл кілтін беліне байлаған мамансымақтар көпшілікпен кездесулер, курстар, семинарлар өткізіп жатады", — деді ол.

Депутаттың пікірінше, елімізде "Сюцай" деп аталатын курстар қаулап тарап жатыр.

"Бұл бағыт өзін "адамның ішкі әлеуетін ашатын сандық психология" деп таныстырғанымен, іс жүзінде ғылыми негізі жоқ, эзотерикалық және діни сипаттағы коммерциялық жобаға айналып отыр. Бүгінде "Сюцай" атауын жамылған топтар жабық форматтағы шаралар өткізіп, өз уағыздарын кеңінен таратып жүр", — деді ол.

Айдос Сарымның айтуынша, олардың басым бөлігі — лицензиясыз, сертификатсыз, тіркелмеген тұлғалар.

Instagram парақшамызға жазылып, ең қызықты ақпараттарды бірінші болып оқыңыз!