Бокс ұлттық спорт деңгейіне көтеріледі. Бұл бастаманы Қасым-Жомарт Тоқаев ұсынып, оны маңызды міндет деп атады.

Ливерпульде өткен әлем чемпионатынан кейін Президент жүлдегерлерді Ақордаға жинап, құрмет көрсетті. Оған қоса атқамінерлерге спортты дамытуға қатысты бірқатар тапсырма берді, ал спортшыларға жауапты міндет жүктеді.

Бокс десе делебесі қозатын қазақ жанкүйерлері өткен аптада марқайып қалды. Тақым қысып, додадаға қосқан жүйріктері жеті рет жеңіс тұғырына көтеріліп, жаһандық кестеде көш бастады. Енді бүгін Англиядағы аламан Ақордада қорытындыланды. Ливерпульдегі тартысты кездесулер Президентке де ерекше әсер қалдырған сыңайлы. Мемлекет басшысы спортшыларға ризашылығын жасырмай, алғысын жаудырды. Әр боксшы мен бапкерге жеке тоқталып, мәртебесін асырды.

Қасым-Жомарт Тоқаев, Қазақстан Республикасының Президенті:

– Біз үшін жекпе-жек спортының орны қашанда бөлек. Тәуелсіздік кезеңінде аға буынның даңқты жолы үзілген жоқ. Жазғы олимпиада ойындарынан ел қоржынына түскен 15 алтынның жетеуі – боксшыларға тиесілі. Бұл сабақтастық болашақта лайықты жалғасын табады деп сенеміз. Оған барлық мүмкіндік бар.

Кейінгі уақытта жастардың спортпен жайлы шұғылдануына жағдай жасалды. Президент осыған назар аударып, инфрақұрылымға мән берілгенін мәлімдеді. Қазір қала да, ауыл да заманауи спорт кешенінен кенде емес. Талантты шыңдайтын, талаптыны қайрайтын орталық көп. Бірақ тоқмейілсуге болмайды. Осы ретте Қасым-Жомарт Тоқаев спорт түрін ұлттық деңгейге көтеру бастамасын ұсынды.

Қасым-Жомарт Тоқаев, Қазақстан Республикасының Президенті:

– Спортшыларымыз – өте дарынды, әлем чемпиондары аз емес. Сондықтан мемлекет боксқа басымдық беріп, оны ұдайы назарда ұстайды. Осы бағыттағы жұмыс жүйелі түрде жүргізілуге тиіс. Біз боксты ұлттық спорт деңгейіне көтеруіміз керек. Бұл – өте маңызды міндет.

Құраманың даңқты жеңісі – бірлескен жұмыстың жемісі. Мемлекет басшысы спортшылардың айналасындағы мамандарды да ұмытпау керек деді. Заманауи үдерістерді ескеріп, озық инновациялық шешімдерді белсенді енгізу туралы тапсырма берді. Сөз арасында Геннадий Головкинге ризашылығын білдірді. Айтпақшы, даңқты спортшы World Boxing ұйымындағы лауазымды қызметке қарамастан, трибунадан табылып, боксшыларымызға қолдау көрсеткен. Бұл құрамаға қатты әсер етті дейді спортшылар.

Виктория Графеева, бокстан әлем чемпионатының күміс жүлдегері:

- Головкиннің арамыздан табылуы қатты әсер етті. Шаршы алаңда оны трибунадан көрудің өзі жігер береді. Әрі бізді қолдап, ақыл-кеңесін де аямады. Өз ісін жетік білетін адамнан кеңес алу шеберлігімізді біраз шыңдады.

Чемпион болу – жауапкершілік. Осы жерде отырған ұл-қыздардан өскелең ұрпақ үлгі алады. Ал балалық шақтың батыры жаман әдеттен ада болу керек. Сол үшін Президент спортшыларға абыройлы атқа лайық болуға шақырды. Әрі қарай Олимп шыңын бағындыратынына сенім білдірді.

Қасым-Жомарт Тоқаев, Қазақстан Республикасының Президенті:

– Үлкен спортта биікке көтерілу оңай емес екені белгілі. Ал сол биікте қалу – одан да қиын жұмыс. Сондықтан жеткен жетістікке масайрап, босаңсуға болмайды. Алдымызда тұрған үлкен белес – Лос-Анджелестегі жаһандық дода. Мен Ұлттық құраманың осы жеңісін Олимп шыңына бастайтын маңызды қадам деп санаймын.

Содан кейін Президент марапаттау рәсіміне ойысты. «Құрмет» ордені, Ерен еңбегі медалі және Президент алғысы табысталды. Бәріне көңіл бөлінді. Спортшылар ғана емес, олардың бапкерлері де төрге шықты. Олар марапатқа да, Президентпен жүздесуге де дән-риза.

Санжар Тәшкенбай, бокстан әлем чемпионы:

- Өте керемет әсердемін. Президенттің қолынан марапат алу әр спортшының арманы. Алдағы мақсат жақсылап демалып, жарақаттарды емдеп, дайындықты бастаймыз.

Әлем чемпионатының әдемі нүктесін құрама капитаны Айбек Оралбай қойған еді. Ақтық сында өзбек боксшысына қарсы жұдырықтасқан ол соңғы сәтте жеңісті жұлып алды. Соның жарқын жеңісінен кейін Қазақстан көш бастаған. Енді жеңіс жолын Олимпиадада жалғап, Парижде кеткен есені қайтарамын дейді ол.

Айбек Оралбай, бокстан әлем чемпионы:

- Ол үшін әлі еңбек ету керек, тер төгу керек. Менің соңғы жекпе-жегім кім бірінші орын алатынын, командалық ойынды шешетін еді. Оңай болған жоқ. Рингке эмоциямен шықтым. Қателіктерім бар, бұйырса қателіктерді жойып, мықты боламыз.

Бүгін төрден табылған боксшылардың көбіне Президент резиденциясы таңсық емес. Олар Ақордаға келіп жүр. Себебі, мемлекет басшысы спорттың бұл түріне ерекше назар аударады. Дүниежүзілік додаларда үнемі қолдап, жігіттерді жігерлендіруден жалықпайды. Енді боксшыларымыз осы сенімді Олимпиада төрінде ақтауы тиіс.

Авторлары: Бекзат Аманов, Марат Диханбаев