«Көктем келсін, көре жатармыз» деп арқаны кеңге салуға болмайды. Шығыс Қазақстан облысының төтенше жағдай қызметі су тасқынына қарсы дайындықты күшейтті. Елдегі су қорының 40 пайызы осы өңірге тиесілі. Жауын жауса, арнасы таситын өзендер бар. Қазір жергілікті әкімдік пен құтқарушылар кешенді жоспармен жұмыс істеп жатыр. Бірнеше ауылда бөгет пен өзен ағысын бұратын арналар салынады. Әсіресе таулы аймақта сақтық шаралары күшейді.

Ертіс алабындағы Үлбі өзенінің ағысы қатты. Әсіресе көктемде арнасынан асып, ырық бермей кетеді. Мәселен, биыл 4 метрге дейін көтерілді. Осы айдың басында су тағы тасып, қатты ағыс Өскеменнің шетіндегі көпірдің тірегін шайып кетті. Қазір Жаңа Үлбі ауылының маңында төтеншеліктер өзен тармағына топырақ үйіп жатыр.

Константин Боровиков, Глубокое аудандық ТЖБ бастығының міндетін атқарушы:

– Мұзбен және үлкен су массасымен ілесіп келетін сең өз жолындағының бәрін шайып өтеді. Мысалы, 2016 жылы аспалы көпірді ағын су алып кеткен. Менің айтпағым – бұл өзен өте қауіпті.

1970-жылдары қазылған арна қазір құрғатылып, жағалауы бекітілуде. Себебі өзеннен 10 метр жерде үйлер бар. «Инженерлер бөгет құрылысы экологияға зиянын тигізбеуі керек», — дейді. Сондықтан құрылысты әуеден дронмен бақылап отыр.

Константин Боровиков, Глубокое аудандық ТЖБ бастығының міндетін атқарушы:

– Біз дронды ұшырып, топырақтың дұрыс төселуін және нығыздалуын анықтаймыз. Бұл – қысымды ұстайтын дамбаның берік, монолитті құрылым болуы үшін қажет.

Жалпы 13 ауданда 30-дан астам бөгет салу жоспарланса, біразының құрылысы қарқынды. Жауаптылар жер қатқанша бар жұмысты аяқтаймыз дейді.

Аян Макиев, Глубокое ауданы әкімінің орынбасары:

– 2025 жылға арналған инженерлік жұмыстар жоспары аясында Глубокое ауданында 6 су тасқынына қарсы іс-шара көзделген. Соның ішінде 2 жоба толық аяқталды. Қазіргі таңда 4 ауылдық округте жұмыстар жүргізіліп жатыр.

Шығыс Қазақстан – еліміздегі суы қоры мол өңірлердің бірі. Облыста ұзындығы 10 шақырымнан асатын 800-ден астам өзен бар. Сондықтан саладағылар су айдындарының жағдайы тұрақты түрде бақылауда болады дейді.

Авторлары: Шыңғыс Қалиден, Вячеслав Ветлугин, Дмитрий Пыхтин