Өзбекстанда 130 жастағы Хувайдо әже ресми түрде елдегі ең қарт адам деп танылды, — деп хабарлайды Massaget.kz тілшісі Gazeta.uz-ға сілтеме жасап.

Басылым дерегінше, Ферғана облысы Бувайда ауданындағы "Қорақұм" махалласында тұратын Хувайдо Умарова 1895 жылғы 1 қаңтарда дүниеге келген. Бұл деректі сот оның үйінде өткен отырыста ресми түрде бекіткен.

"Енді Хувайдо әже Өзбекстандағы ең қарт әйел ретінде ресми танылды", – делінген ведомство хабарламасында.

Бұған дейін аудандық әділет бөлімі оның туу дерегі тіркелмегенін анықтап, сотқа жүгінген еді. Көканд қаласының ауданаралық азаматтық істер соты өтінішті қанағаттандырды.

Туыстары Хувайдо әжені әлемнің ең қарт тұрғыны ретінде Гиннес рекордтар кітабына енгізуге өтініш беруді жоспарлаған. Бірақ 1999 жылы берілген паспортында туған күні көрсетілмегендіктен, рәсім кейінге қалған. Енді жасы ресми расталған соң, мұндай мүмкіндік бар екенін министрлік атап өтті.

Айта кетейік, биыл тамызда Гиннес рекордтар кітабы әлемдегі ең қарт адам ретінде 116 жастағы Ұлыбритания тұрғыны Этель Катерхэмді атаған болатын. Ол ұзақ ғұмырында Үндістанда өмір сүріп, екі қыз тәрбиелеген, сүйікті жарынан 1976 жылы айырылған. Кейін қыздары да қайтыс болған.

Instagram парақшамызға жазылып, ең қызықты ақпараттарды бірінші болып оқыңыз!