Қазақстан мұнай өндіру көлемін жылына 100 миллион тоннаға жеткізеді.

Атырау, Павлодар, Шымкент қалаларындағы 3 ірі кәсіпорын жаңғыртылды. Нәтижесінде ішкі нарықты сапалы жанар-жағармаймен толық қамтуға мүмкіндік туды. 13 млн-ға жуық адам табиғи газға қол жеткізді. Бүгін мұнай-газ саласының қызметкерлерін кәсіби мерекемен құттықтаған Президент қазір бұл бағытта бұрын-соңды болмаған ауқымды жобалар іске асырылып жатқанын мәлімдеді. Өз сөзінде Қасым-Жомарт Тоқаев осы салада аянбай тер төгіп жүрген 200 мыңнан астам адамның табанды еңбегін атап өтіп, шынайы ризашылығын білдірді.

Ел дамуының қуатты қозғаушы күші — мұнай-газ химиясы. Қазақстанда алғашқы қара алтынның табылғанына 125 жылдан асты. Осы уақыт аралығында сала сапалы түрде дамыды. Пластмасса, полимер, тыңайтқыш, отын, медицина мен тұрмыста қолданылатын мыңдаған өнім осы саладан бастау алады. Қазір бұл бағытта 200 мыңнан астам адам жұмыс істейді. Осы мамандардың табанды еңбегін атап өткен Президент, шынайы ризашылығын білдірді.

Қасым-Жомарт Тоқаев, Қазақстан Республикасының Президенті:

- Мұнай мен газ – стратегиялық маңызы бар ресурс, бұл жұртшылыққа белгілі дерек. Себебі бұл сала еліміздің өсіп-өркендеуіне айрықша ықпал етті. Тәуелсіздік жылдары қара алтынның игілігін молынан көрдік. Қазіргі таңда бұл сала қарқынды дамып келеді. Қазақстан әлемдік мұнай нарығындағы жетекші мемлекеттің бірі саналады. Егемендік кезеңінде еліміздегі мұнай өндірісі төрт есе өсті. Жақын арада мұнай өндіру көлемін жылына 100 миллион тоннаға жеткіземіз.

Бүгінде еліміз шикізатты өндіріп қана қоймай, оны терең өңдеуге де басымдық береді. Бұл бағытта Атырау, Павлодар, Шымкент қалаларында орналасқан 3 ірі кәсіпорын жаңғыртылды. Соның арқасында 13 млн-ға жуық адам табиғи газға қол жеткізіп, ішкі нарықты сапалы жанар-жағармаймен толық қамтып отырмыз.

Қасым-Жомарт Тоқаев, Қазақстан Республикасының Президенті:

- Қазір бұл бағытта бұрын-соңды болмаған ауқымды жобалар іске асырылуда. Қашағанда жаңа газ өңдеу зауытының құрылысы жүріп жатыр. «Бейнеу – Бозой – Шымкент» газ құбырының екінші желісі салынуда. Сондай-ақ біз қосымша құны жоғары өнімдер шығаруды қолға алдық. Мұнай-газ химиясы саласында бірқатар ірі жобаны іске қосамыз. Мұның бәрі 20 мыңға жуық жұмыс орнын ашуға мүмкіндік береді. Соның ішінде полиэтилен зауытын ерекше атап өткім келеді. Бұл шетел инвесторларымен бірге іске асырылып жатқан маңызды жоба. Инвестиция көлемі 7 миллиард доллардан асады.

Сонымен қатар Мемлекет басшысы «Қаламқас-теңіз» және «Хазар» сынды ірі теңіз кен орындарын игеру басталғанын мәлімдеді. Ол үшін 6 млрд доллардан астам инвестиция салынған. Ал мұндағы теңіз платформаларының құрылысын отандық кеме құрастырушы кәсіпорын жүргізмек. Саладағы оң өзгерістерге бүгін ардагерле де көңілі толатындығын жеткізді.

Бақыбай Ахметұлы, сала ардагері:

- Қазір компьютер көп. Жұмыста бұл жеңіл. Барлық режимдерді, отчеттарды барлығын, жұмыс өнімділігін арттырады. Сосын разведканың жұмыстары бар, жаңа геофизикалық қондырғылар бар. Қазір салаға көңіл толады.

Қазақстан барлық шетелдік инвесторлармен әріптестікті нығайтуға әрдайым баса мән береді. Бүгінде мұнай-газ саласында америкалық, ресейлік, еуропалық және қытайлық алпауыт компаниялар ұзақ жылдар бойы жұмыс істеп келеді. Өз сөзінде Президент шығыстағы көрші елге жасаған сапары барысында табысты келіссөз жүргізіп, қазақ-қытай іскерлік кеңесінің қорытындысы бойынша жалпы сомасы 15 млрд долларға жететін 70-тен астам коммерциялық құжатқа қол қойылғанын айтты.

Қасым-Жомарт Тоқаев, Қазақстан Республикасының Президенті:

- Қытайлық серіктестермен бірге мұнай-газ саласында көптеген жоба жүзеге асырылып жатыр. Сондай-ақ стратегиялық сипаттағы жаңа жобалар жоспарланған. Оның ішінде +++Ақтөбе облысында карбамид шығаратын газ-химия кешенінің құрылысы жөнінде СNPC компаниясымен жасалған келісімді ерекше атап өткім келеді. +++ Жоба құны 1 миллиард доллардан асады. Атырау облысында этан және пропан тасымалдауға арналған магистральді құбыр құрылысын қаржыландыру бойынша Қытай даму банкімен жасалған уағдаластықтың да маңызы зор. Келісімнің жалпы сомасы – 530 миллион долларға жуық.

Қазір көптеген елдер көмірсутегіне тәуелділікті азайтуға тырысып жатыр. Дегенмен, баламалы энергия көздері тиісті қажеттілікті толық өтей алмайды. Осы ретте Қасым-Жомарт Тоқаев көмірсутегі Қазақстанның энергетика саласында бұрынғыдай басты рөлге ие бола беретіндігін мәлімдеді. Сол себепті оны тиімді пайдалану қажет, дейді Президент.

Қасым-Жомарт Тоқаев, Қазақстан Республикасының Президенті:

- Өнеркәсіпте, соның ішінде электр стансаларының құрылысында көмірді залалсыздандыратын озық технологияны пайдалануға баса мән беру қажет. Қазақстанның энергия балансында көмірдің үлесі 70 пайызға жуық екені мәлім. Еліміз көмір өндіруден он ірі елдің қатарына кіреді. Бұл артықшылықтан бас тартпаған жөн. Керісінше, оны тиімді пайдалану керек.

Ал отандық мұнай-газ кешенінің алдында технологиялық жаңғыру, атап айтқанда, жасанды интеллектіні енгізу міндеті тұр. Президент салаға таза әрі озық технологиялар қажет екенін жеткізді. Сонымен қатар геологиялық барлауды күшейтіп, жаңа кен орындарын ашу да маңызды.

Қасым-Жомарт Тоқаев, Қазақстан Республикасының Президенті:

- Бұған қоса осы салаға білімді, жас кадрларды тартып, адам әлеуетін барынша арттыру қажет. Себебі жаһандық бәсекеге қабілетті болу үшін бізге, ең алдымен, білікті мамандар керек. Білім бағдарламасын жетілдіріп, зерттеу орталықтарын дамытқан жөн. Осы міндеттерді сапалы орындасақ, Әділетті, Қуатты, Таза және Озық Қазақстанның қалыптасуына жол ашамыз.

Биыл жұмысшы мамандар кеңінен дәріптеліп, оларға ерекше құрмет көрсетіліп жатыр. Жыл басынан бері Президент еліміздің әр саласында еңбек етіп жүрген азаматтарды арнайы шақырып, марапаттады. Мемлекет басшысының сөзінше, бұл — халқымыздың еңбек адамына деген ықыласы мен алғысының көрінісі.

Риат Шони, тілші:

- Мұнай-газ химиясы – ел экономикасы мен ғылымының маңызды саласы. Оның дамуы – индустрияның тірегі, жаңашылдықтың негізі. Бұл жетістіктің артында күн-түн демей тер төккен мыңдаған маманның еңбегі тұр. Ал бүгінгі мына марапаттар сол еңбектің лайықты бағасы.

Маңдай термен табылған адал еңбектің қадірін білген жұрт қашанда озық ойлы болады деп сөзін қорытындылаған Президент, еліміздің мұнай-газ саласын дамытуға елеулі үлес қосқан бір топ азаматты мемлекеттік наградалармен марапаттады.

Ергеш Масақбаев, "QazaqGaz Aimaq" АҚ Шымкент өндірістік филиалының монтері:

- 25 жыл болды. 2001 жылы кіргем содан әлі бір жерде жұмыс істеп жатырмын. Жұмысымыз жақсы. Алға жүріп жатыр. Президентіміз Қасым-Жомарт Кемелұлы Тоқаевқа рахмет. Келіп, құттықтап жатыр бізді. Бізге керегі жақсы сөз ғой,құттықтау деген, енді рабочий адамға. Қарапайым жұмысшы. Оларға бұл үлкен мәртебе. Оларға күш береді, қуат береді әрі қарай жұмыс істеуге.

Қошеметке бөленгендердің қатарында «ҚАЗТРАНСОЙЛ» АҚ батыс операторлық қызметтер көрсету басқармасының операторы Бисенбай Сарманов та болды. Бұл салада 30 жыл бойы қызмет етіп келеді. Кезінде әкесі де мұнай саласында тер төгіп, ұлын еңбекқорлық пен адалдыққа баулыған. Сол еңбектің нәтижесі міне, «Құрмет» ордені.

Бисенбай Сарманов, "Қазтрансойл" АҚ Батыс операторлық қызметтер көрсету басқармасының операторы:

- Басшылар қолдау көрсетіп, еңбегімізді бағалап жатыр. Президентімізге рахмет, биыл жұмысшылар жылы деп бастама көтеріп жатыр. Сол үшін ризамыз. Еліміз аман, жұртымыз тыныш болсын.

Айта кету керек, мұнай-газ саласының қызметкерлерінің кәсіби мерекесі қарсаңында 40-қа жуық маман Президент қолынан жоғары марапаттарын алды. Бұл жандар болашақтың өркендеуіне үлес қосып жүрген нағыз еңбек ерлері. Олардың табандылығы мен кәсіби біліктілігі — дамудың алтын арқауы, өркениеттің басты кепілі.

Риат Шони, Ержан Қанапияұлы