Біздің елде ем іздеп бартын тағы бір ел – Оңтүстік Корея. Бірақ бұл мемлекет те онкологиямен күресіп әлек, деп хабарлайды 24kz.
Мұндағы халықтың 5%-і немесе 2,5 миллионнан астам адам қатерлі ісікке шалдыққан. Дегенмен, қазіргі медицинаның бір мүмкіндігі науқасты құлан таза жазбаса да, өмір жасын сәл де болса ұзартқан.
Владислав Цой, тілші:
- Оңтүстік Кореяның халқының шамамен 5%-і қатерлі ісікке шалдыққан. Бұл 2,5 млн адам. Ең көп таралған түрлері – қалқанша безінің қатерлі ісігі, тоқ ішек обыры, өкпе, сүт безі және асқазан қатерлі ісігі. Алайда ем-домнан нәтиже жоғары. Науқастардың жалпы өмір сүру деңгейі 72%-ке жеткен. Бұл дегеніміз – науқас ем алғаннан кейін немесе ота жасалған соң ұзақ уақыт онкологтарға жүгінбейді. 20 жыл бұрынғы көрсеткішпен салыстырғанда нәтиже 18%-ке артқан. Дәрігерлердің айтуынша, мұндай жоғары көрсеткіш жаңа емдеу әдістері мен ерте диагностика байланысты.
Хван Ду Ён, Донггук университетінің профессоры:
- Бұрын химиотерапия өте уытты болатын. Соңғы жылдары пациенттің геніне сай жеке таңдалып қолданылатын иммунотерапия немесе нысаналы терапия кеңінен енгізілді. Сонымен қатар қазір нейтрондық және протондық терапия бар, бұл науқастарға емді әлдеқайда қолайлы етеді. Бұдан бөлек, асқазан мен тоқ ішек қатерлі ісігін ерте анықтау үшін елде ұлттық скрининг бағдарламасы жұмыс істейді. 40 жастан асқан азаматтар екі жыл сайын гастроскопиядан өтеді, ал 50 жастан бастап әр бес жыл сайын колоноскопиядан өтуі тиіс. Бұл тексерулер медициналық сақтандыру есебінен тегін жасалады.
Диагностика мен емдеу тиімділігінің арқасында шетелдік науқастардың саны да көбейген. Өткен жылы 1 миллион 170 мыңнан астам адам емделу үшін Оңтүстік Кореяға келген. Олардың ішінде қазақстандықтар да аз емес – шамамен 15 мыңға жуық.
Рахия Жүсіпбекова, медициналық үйлестіруші:
- Қазақстан азаматтары жиі чекап үшін келеді. Алдымен Қазақстанда тексеріліп, кейін осында тағы да тексерілетін жағдайлар көп. Астана, Алматы, Шымкент қалаларында жақсы жабдықтар бар, бірақ басқа қалаларда аздау, әлі толық дамымаған. Ал Кореяда барлық аймақтарда сапалы клиникалар бар және КТ, МРТ секілді диагностика жасайтын жабдықтар жоғары деңгейде дамыған.
Владислав Цой, тілші:
- Дәрігерлер жыл сайын тексеруден өтуге кеңес береді. Себебі қатерлі ісік ерте кезеңде анықталған науқастардың 90%-тен астамы емнен кейін ұзақ өмір сүреді. Сондай-ақ ерте сатысында химиотерапиясыз, тек ота жасаудың өзі жеткілікті болады.
Авторлары: Владислав Цой, Ольга Лян
