Қыркүйекте Астанада өтетін әлемдік және дәстүрлі дін лидерлерінің VIII съезіне Сауд Арабиясы Корольдігінен мәртебелі меймандар қатысады, деп хабарлайды 24kz.
Ауқымды делегация құрамын елдің Ислам істері министрі шейх Абдуллатиф бен Абдулазиз бен Абдрахман Әл аш-Шейх бастап келеді. Бұл туралы Эр-Риядта қазақстандық сыртқы саяси дипломатия өкілдерінің құзырлы орган жетекшілерімен өткен кездесуде айтылды. Тараптар дінаралық диалог алаңында көтерілетін мәселелерді талқылап, ұсыныстарды сөз етті.
Рауан Мыңбай, тілші:
- Сауд Арабиясының Ислам істері министрлігі елдің ішкі тұтастығын сақтауға тікелей ықпал етіп отырған ұйым. Экстремистік ағымдарға қарсы күрес жүргізіп, жолын кеседі. Көп жылдан бері оның жетекшісі қызметін атқаратын шейх Абдуллатиф бен Абдулазиз бен Абдрахман Әл аш-Шейх діни толеранттылық ұстанымдарымен белгілі. Ғалым әрі ағартушы ретінде танымал. Елдегі беделді дінбасылардың бірі Астанаға арнайы барып, гуманистік көзқарастарын жария етпек.
Мұхаммед ибн Абдулуахид Әл Арифи, Сауд Арабиясы Ислам істері министрінің кеңесшісі:
- Сауд Арабиясы мен Қазақстанның қарым-қатынасы айрықша әрі берік негізде қалыптасып келеді. Мәдени және экономикалық та байланыстарымыз бекем. Бізді бірінші кезекте ислам біріктіреді. Осы тұрғыда Корольдіктің ұстанымы айқын: экстремизм, зорлық-зомбылық және фанатистік көзқарастың барлығын жоққа шығара отырып, бірлескен ынтымақтастықты адами құндылықтар негізінде ілгерілету, құқық пен өмірлік қажеттіліктерді төрге оздыру.
Саудия үкіметі қазақ жеріндегі дін және конфессияаралық диалог алаңының мән-маңызын жоғары бағалайды. Алғаш ұйымдастырылған кезеңнен бері оған тұрақты түрде қатысып келе жатқан Корольдік өкілдері халқымыздың бейбітсүйгіш қасиетіне тәнті. Олардың айтуынша, дін мен дәстүрді өзіндік үлгіде ұштастыра білген Қазақстансыз мұндай көшбасшылар сьезін елестету мүмкін емес. Екеуі бірін-бірі ұдайы толықтырып тұратын егіз ұғым іспеттес.
Мұхаммед ибн Абдулуахид Әл Арифи, Сауд Арабиясы Ислам істері министрінің кеңесшісі:
- 6 жылдан бері ауқымды конференцияға қатысып келемін. Ол Қазақстанның дінаралық қатынастарды жақсартуға бағытталған гуманистік ұстанымын айғақтайды. Сауд Арабиясы съездің бір бөлшегіне айналды десем болады. Бұл Корольдіктің де дінаралық диалогты нығайтуға деген сенімін білдіреді. Ол түсінікті. Өйткені ислам жалпы адам құндылықтарын басшылыққа алады. Бір жағынан Саудияның келісім мен бейбітшілікті ілгерілету ісінде тәжірибесі мол. Біздің елдің ғалымдар делегациясы 1970 жылдары Ватиканда болған. Сол кезде адамзатты алаңдатқан бірқатар мәселе оң шешімін тапқан.
Сонымен, қыркүйектің екінші онкүндігінде елордамыз сүбелі сөз алаңына айналады. Қаншама қонақ, мәртебелі мейман қазақ жерінде бас қосып, таң-тамаша болады. Ең бастысы, съезде айтылатын көкейтесті мәселелер мен салмақты шешімдер қорытынды тарихи құжатқа енеді. Саудияның Ислам істері министрлігі ресми делегация құрамына 12 адам енгізіп отыр. Солардың бірі мемлекет басшысы деңгейінде өтетін хатшылық отырысына қатысса, енді бірі жас лидерлер форумында бой көрсетеді.
Рауан Мыңбай, тілші:
- Айта кетейік, әлемде Саудия Корольдігінің тікелей қолдауымен жұмыс істейтін «Дүниежүзілік ислам лигасы» атты ұйым бар. Штаб пәтері Меккеде орналасқан. Кейінгі жылдары еліміз бен осы іргелі бірлестік арасында мәдени-рухани байланыс қарқынды дамып келеді. Соның нақты көрінісі ретінде лига басшысы Астанаға ресми сапармен баратын болды. Съезге қатысып қана қоймай, екіжақты кездесулер өткізеді. Біздің тарап үшін бұл сапардың жөні бөлек. Оның аясында қазақ жерінде пайғамбар музейін салу мен мүфтиятпен бірлесе құранды жатқа айту жарысын ұйымдастыру сынды мәселелер қаралуы мүмкін.
Авторы: Рауан Мыңбай
