Алматыда «Jas Camp» жастар лагері жұмысын бастады. Жоба Алматы қаласы Жастар саясаты басқармасының қолдауымен жүзеге асырылуда. Биыл аталмыш жобаға 100 қатысушы іріктеліп алынған. Олардың қатарында студенттер, комьюнити-орталықтардың резиденттері, волонтёрлер, жастардың экологиялық қозғалыстарының өкілдері және NEET санатындағы жастар бар.

Олар 5 күні бойы көшбасшылық дағдыларын дамытып, әлеуметтік жобалар жасауды үйренеді.

Лагерь бағдарламасында тренингтер, мастер-класстар, фасилитациялық сессиялар, воркшоптар мен мәдени іс-шаралар өтеді деп жоспарланған. Менторлар мен сарапшылардың қатарында Асхат Абжанов, Камилла Әкімбекова, Жанель Сариева, Дана Шаяхмет және басқалар бар.

«Jas Camp – тек білім беру алаңы ғана емес, жастар өз шешімдері мен іс-әрекеттері үшін жауапкершілікті үйренетін орта болмақ. Әр күннің бағдарламасында командалық өзара әрекеттестікті дамытуға арналған жаттығулар, қоғамдағы жеке рөлін түсіну тәжірибелері, сондай-ақ қаланың құндылықтары мен болашағы туралы пікірталастар қарастырылған. Ерекше назар экологиялық мәдениет пен жастардың дамуына аударылды. Бағдарламаның маңызды бөлігі – жастарда қоршаған ортаға ұқыпты қарау әдетін қалыптастыру және әлеуметтік белсенділікті арттыру», — деді Алматы қаласы Жастар саясаты басқармасының басшысы Азиз Кажденбек.

Ұйымдастырушылардың айтуынша, мұнда жеке тұлғалық өсуге, көшбасшылық қасиеттерді нығайтуға және тек жастардың өздеріне ғана емес, бүкіл мегаполистің болашағына маңызды идеяларды жүзеге асыруға жағдай жасалуда. Жас қатысушылар жауапкершілікті алуды, стратегиялық ойлауды және экологиялық мәдениетті дамытуға бағытталған шараларға қатысады.