Ақмола облысы ауыл шаруашылығы өнімдерінің көлемін 1,2 триллион теңгеге жеткізуді көздеп отыр, деп хабарлайды 24kz.

Осылайша, сектор көшбасшысы ретіндегі орнын нығайтпақ. Биыл өңірде өнімділік өте жоғары. Майлы дақылдар алқабы 2,5 есе ұлғайған. Бұл туралы Президентке есеп берген аймақ басшысы Марат Ахметжанов мәлімдеді. Әкімнің айтуынша, барлық негізгі көрсеткіш бойынша өсім сақталған. Аршалы ауданында Aqmola индустриялық аймағы құрылып, құны 4 миллиард доллардан асатын инвестициялық портфель жасақталды. Осы арқылы 10 мыңға жуық жұмыс орны ашылады. Әлеуметтік бағыт та әлеуетті. Соңғы екі жыл ішінде 4,7 мың тұрғын баспаналы болды. Жаңа оқу жылы қарсаңында апатты жағдайдағы және үш ауысымды мектептер мәселесі толық шешілді. Жылыту маусымына дайындық та жоспарға сай жүргізіліп жатыр. Кездесуде Президент реновация бағдарламасы арқылы халықтың әлеуметтік осал тобын баспанамен қамтудағы облыстың оң тәжірибесін атап өтті. Сонымен қатар егін жинау науқаны, Қосшы қаласының дамуы, су тасқынына қарсы жұмыс жайлы бірқатар міндет жүктеді. Инвестиция тарту жөнінде нақты тапсырма берді.