Премьер-министр Олжас Бектенов Қырғызстанның Шолпан-Ата қала­сын­да өтіп жатқан Еуразиялық үкіметаралық кеңестің шағын құрам­дағы отырысына қатысты.

Сондай-ақ бұл жиынға Беларусь Республикасының Премьер-министрі Александр Турчин, Қырғыз Республикасы Министрлер кабинетінің төрағасы – Президент Әкімшілігінің басшысы Адылбек Қасымалиев, Ресей Федерациясы Үкіметінің төрағасы Михаил Мишустин және Армения Республикасының вице-премьері Мгер Григорян қатысты.

Онда биылғы 31 қаңтарда Алматы қаласында өткен Еуразиялық үкіметаралық кеңесте берілген тапсырмалардың орындалу барысы қаралды. Кедендік және салықтық әкімшілендіруді цифрландыру саласындағы интеграцияны дамытудың стратегиялық бағыттарын жүзеге асыруға, қазіргі заманғы технологияларды қолдана отырып ақпарат алмасуды жетілдіре түсуге назар аударылды.

Сапар аясында Үкімет басшысы Олжас Бектенов «Қазақстан» шипажайының жаңа ғимаратының құрылыс алаңында болып, Ғылым және жоғары білім вице-министрі Гүлзат Көбенова, Туризм және спорт вице-министрі Серік Жараспаев пен Президент Іс басқармасы медициналық орталығының басшысы Алексей Цойдың Қырғызстанда орналасқан елімізге қарасты курорттық-рекреациялық төрт нысанның жағдайы туралы баяндамаларын және инвесторлармен серіктестікте оларды кезең-кезеңімен жаңғырту жоспарларын тыңдады.

Премьер-министрге «Қазақстан» шипа­жайының жаңа ғимараты құрылысы­ның жоспарлы түрде жүргізіліп жатқаны: демонтаждау және құрылыс орнын дайын­дау жұмыстары аяқталғаны, негізгі корпустар­дың, коттедждер мен шаруашылық блоктар­дың іргетасы мен монолитті қаңқасын салу жалғасып жатқаны туралы баяндалды.

Сондай-ақ 500 орындық «Самал» демалыс үйіне жаңғырту жұмыстарын жүргізу жос­парланған. Қазірдің өзінде инвестор анық­талып, инвестициялық келісімнің жобасы да­йын­далып, жыл бойы жұмыс істейтін 3-4 жұл­дызды заманауи қонақ үй салу үшін жобалау-сметалық құжаттама әзірленіп жатыр.

Бостери (Ыстықкөл облысы) ауылындағы «Университет» спорттық-сауықтыру лагеріндегі курорттық-рекреациялық аймақты дамыту тұжырымдамасын әзірлеу қолға алынған. Нысанды реконструкциялау бойынша инвесторлармен келіссөздер жүргізіліп жатыр. Аталған нысан базасында еліміздің спортшыларын жаттықтыруға арналған спорттық инфрақұрылым – спорт залдары, бассейндер және тағы басқа нысандар құрылады.

Сондай-ақ инвестормен бірлесіп «Олимп» спорттық-сауықтыру орталығын жөндеу, жұмыс істеп тұрған нысандарды реконструкциялау және қосымша спорт ғимараттарын салу мәселесі пысықталып жатыр.

Премьер-министр жауапты министр­ліктер мен мүдделі мемлекеттік ұйымдарға жобалардың сапалы жүзеге асырылуын қамтамасыз етуді және реконструкциялауды бастау үшін қажетті рәсімдерді жеделдетуді тапсырды.