Қант диабеті әлеуметтік маңызы бар аурулар тізімінен алынып тасталса да, оған шалдыққан азаматтарға медициналық қолдау көрсету шарасы жалғаса береді, деп хабарлайды 24kz.

Денсаулық сақтау министрлігіне қарасты Медициналық көмекті ұйымдастыру департаментінің директоры осылай деді. Гүлнәр Сәрсенбаеваның айтуынша, науқастарға көрсетілетін көмек пен дәрі-дәрмектердің қолжетімділігі өзгеріссіз қалады. Бір ғана айта кететін жайт – енді бұл тетік МӘМС жүйесі арқылы іске асады. Себебі ол тұрақты әрі уақытылы қаржыландыруға мүмкіндік береді. Бүгінде қант диабетімен ауыратындардың саны 536 мыңға жуықтайды. Олардың 96%-і сақтандырылған.

Гүлнәр Сәрсенбаева, ҚР ДСМ Медициналық көмекті ұйымдастыру департаментінің директоры:

- Медициналық көмек көрсететін механизмі барлығы сол күйінде қалады. Тек қана төлемі МӘМС есебінен. Бүгінде 500 мыңнан астам науқас динамикалық бақылауда бар. Оның ішінде балалар, мүгедектігі бар адамдар бүгінде әлеуметтік сақтандыру жүйесінде отыр. Оларға әлеуметтік сақтандыруды мемлекет төлейді.