Францияның Шартр қаласында қазақстандық суретші Аяла Ибрагимованың «Қазақ даласының ертегілері» атты жеке көрмесі өтіп жатыр. Экспозиция ежелгі мозаика өнеріне негізделген.

Аяла қазіргі уақытта Италияның Спилимберго қаласында тұрады, шығармашылықпен айналысады. Бұл шағын қала мозаика шеберлері арқылы әлемге танымал. Франциядағы алғашқы жобасында суретші қазақ халқының ертегі-аңыздарын заманауи көркемдік тәсілмен жеткізеді. Экспозицияда қазақ мифологиясындағы кейіпкерлер бейнеленіп, ұлттық ою-өрнек элементтері қамтылған. Автор өз шығармашылығы арқылы халқымыздың бай фольклоры мен мәдени мұрасын насихаттауды мақсат етеді. Көрме төрт айға созылады.

Жан-Мари Бюртон, ұйымдастырушы:

- Аяла туған жерінің мәдениетін көрерменге шебер жеткізе білді. Оның жұмыстарын көруге арнайы келгендер де, кездейсоқ кіргендер де қызығушылық танытып жытыр. Көрме залы туристер көп жүретін жерде орналасқан. Сондықтан қала тұрғындары да, қонақтар да жиі бас сұғады.