Газа секторындағы гуманитарлық ахуал күн сайын қиындап барады. Осындай күрделі кезеңде Дейр-әл-Балах қаласындағы наубайханалардың бірі екі айлық үзілістен кейін қайта іске қосылды. Бұл БҰҰ-ның Дүниежүзілік Азық-түлік бағдарламасының қолдауымен мүмкін болды. Қайта жанданған өндірісте пісірілген нан бүгінде аса мұқтаж жандарға тегін таратылып жатыр.
Газада гуманитарлық көмектің алғашқы легі жеткен бойда бірнеше айлық үзілістен кейін наубайхана қайта іске қосылды. Қазір мұнда қызметкерлер қамыр илеп, нан пісіріп, дайын өнімді қапқа салып әлек. Бұл нан алдағы уақытта ең мұқтаж отбасыларға тегін таратылады.
Владимир Йовцеф, БҰҰ Дүниежүзілік азық-түлік бағдарламасының өкілі:
- Шекара өткелдері 2,5 айдан астам уақыт бойы жабық болғандықтан, Газа секторының гуманитарлық жағдайы аса ауыр күйге түсті. Біз көмек жеткізуді жалғастырып, өткелдердің қайта ашылуын қамтамасыз етуіміз қажет. Азық-түліктің мұқтаж жандарға жетуін қамтамасыз ету – баршамыздың ортақ жауапкершілігіміз.
Ресми өкілдердің мәлімдеуінше, Израиль шектеулерді азайтқан соң азық-түлік тиеген алғашқы жүк көліктері келе бастаған. Алайда жергілікті үкіметтік емес ұйымдар қазіргі жеткізіліп жатқан көлемнің тым аз екенін айтады. Халықтың қажеттілігін толығымен өтеу үшін гуманитарлық жәрдемді бірнеше есе ұлғайту қажет.
Ахмед әл-Банна, наубайхана иесі:
- Газада аштық жайлап тұр. Кеше түнгі сағат 23:00-де бізге БҰҰ-ның Дүниежүзілік азық-түлік бағдарламасы арқылы ұн жеткізілді. Сол сәттен бастап бірден жұмысқа кірістік. Өйткені мұқтаж жандарға таратып үлгеруміз керек.
Деректерге сүйенсек, Газадағы халықтың төрттен бірі, шамамен 600 мың адам, аштықтың алдында тұр. Қазір Газа секторының оңтүстігінде бірқатар наубайхана қайта іске қосылды. Десе де солтүстік аймақтарда олар әлі де жабық. Гуманитарлық ұйымдар көмекке кең көлемде қол жеткізуді қамтамасыз етіп, тіршілікке қажет инфрақұрылымды шұғыл қалпына келтіруге шақырып жатыр.
Авторы: Динара Орынтай
