Астанада жасанды интеллект негізінде жұмыс істейтін бес бірдей жобаның таныстырылымы өтті. Оны Назарбаев университетіне қарасты Ақылды жүйелер мен Жасанды интеллект институтының мамандары әзірлеген. «Ойлан», «Мәңгі-сөз», «Тіл-синк», «Бейнеле» және « Мәңгі-тас » деп аталатын жобалар үш тілде жұмыс істейді.
Басты ерекшелігі – қазақ тілінде сапалы мағлұмат бере алады. Мәселен, Ойлан жобасы қолданушыларға латын қаріпінде жауап бере алады. «Мәңгі-сөз» жүйесі аудионы 4 тілде дыбыстап, аударуға бейімделсе, «Тіл-синк» нақты уақытта, субтитр және аударма құралы ретінде жұмыс істейді. Ал «Бейнеле» жобасының мәтіндік сұраныс арқылы визуалды контент жасауға мүмкіндігі бар. «Мәңгі-тас» жүйесі арқылы, жасанды интеллект мүмкіндіктерін мектептерде және мемлекеттік мекемелерде пайдалануға жол ашылмақ.
Ербол Әпсалямов, ISSAI атқарушы директоры:
– Жылдың аяғына дейін біздің жоспарымыз – мультимоделді жасау. Яғни ол ауди, мәтін, сурет, бейне арқылы да жұмыс істей алады. Осы күнге дейін 120-дан астам ғылыми-зерттеу мақала жаздық. Барлығы дүниежүзілік танымал конференцияда жарияланған.
