Биыл Атырау облысында 169 этникалық қазақ қандас мәртебесін алды, деп хабарлайды 24KZ. Олар Өзбекстан, Ресей, Түрікменстан, Қытай және Моңғолиядан қоныс аударған. Қандастар облыс орталығынан бөлек Жылыой, Құрманғазы және Мақат аудандарында тұрақтады.

Облыстық Жұмыспен қамтуды үйлестіру, және әлеуметтік бағдарламалар басқармасының мәліметінше, биыл қандастарды орналастыруға өңірге 100 квота бөлінді. Олардың көшіп-келуі үшін жол шығынын өтеуге әлеуметтік төлем берілді. Баспана жалдау және коммуналдық қызметтер үшін ай сайынғы көмек те тағайындалды.

Асылзада Сүндетова, Жұмыспен қамтуды үйлестіру және әлеуметтік бағдарламалар басқармасының бас маманы:

- 81 адамға отбасын көшіруге 70 АЕК мөлшерінде әлеуметтік төлемдер төленді. 6 отбасы 13 адамға ай сайынғы тұрғын үйді жалдауға 20-25 АЕК төлемдер тағайындалды. «Мансап» орталықтарына хабарласқан қандастарымызға әлеуметтік қолдау түрлері көрсетіліп жатыр. Атап айтқанда, 2 қандасымыз тұрақты жұмысқа орналастырылды. 2 қандас қоғамдық жұмысқа және 1 қандасты қайта даярлау курсына жібердік.