Руслан Желдібай Халықаралық дзюдо федерациясының (IJF) жаңа технологиялар және тиімділікті арттыру бойынша комиссиясының директоры қызметіне тағайындалды. Бұл қосымша қоғамдық негіздегі қызмет , деп хабарлайды Egemen.kz.

Руслан Желдібай өзінің әлеуметтік желідегі парақшасында бұл тағайындау үшін IJF басшысы Мариус Визер мырзаға алғысын білдіріп, халықаралық ұйымдардағы қазақстандық өкілдердің маңызын атап өтті.

«Еліміздің халықаралық спорт ұйымдарында өкілдерінің болуы — өте маңызды. Бұл қадам арқылы еліміздің беделін нығайтумен қатар, тәжірибе де алмасамыз», деп жазды ол.

Оның айтуынша, қазіргі таңда Қазақстанда дзюдо спортын дамыту бағытында көптеген жұмыс жүргізіліп жатыр. Дегенмен, шешімін күткен мәселелер де аз емес.

«Дзюдоны елімізде дамыту бағытында біраз жұмыс атқарылып жатыр. Әлі де мәселе жетерлік. Дзюдоны кеңінен дамыту үшін арнайы академия, ал аймақтарда орталықтар қажет болып тұр. Халықаралық ынтымақтастықты да арттырамыз. Осы іске барынша өз үлесімді қосамын», деді Руслан Желдібай.