Титаниктей алып айсберг Гренландиядағы Инаарсуит елді мекенінің жағалауына жақындап келді. Бұл — қауіпті жағдай, — деп хабарлайды Massaget.kz тілшісі New York Post басылымына сілтеме жасап.

Бірнеше күннен бері бұл айсберг Инаарсуитке қарай жылжып келе жатқан. Осыған байланысты жергілікті билік тұрғындарға ескерту жасап, балық зауыты мен дүкен уақытша жабылды.

"Егер бұл үрей тудыратын мұзды айсберг жағаға соғылса не жарылып кетсе, бұл апатқа әкелуі мүмкін. Мұздың бөлінген бөліктері бірден құрлыққа түседі деп айту қиын, бірақ олардың суға құлауы күшті толқындар туғызуы мүмкін. Ал ол толқындар жағалаудағы құрылыстарға зақым келтіріп, кейбір төмен орналасқан немесе кей ғимараттарды түгел шайып кетуі ықтимал", – деп мәлімдеді арал билігінің өкілдері.

Билік өкілдері адамдарға аралға қайықпен барғанда айсбергке жақындамауға кеңес беріп, тіпті құрлықтағы күнделікті тіршілікте де сақ болуға шақырды.

NDTV мәліметінше, бұл айсберг қазір екіге бөлініп, елді мекеннің үстінен төніп тұр. Оның биіктігі 100 метрден асады, салмағы – 11 миллион тонна. Жергілікті билік төтенше жағдай жариялап, ауылдың бір бөлігін эвакуациялаған.

Айта кетейік, бұл — Инаарсуит портына осындай үлкен айсбергтің алғаш келуі емес. 2018 жылы да көлемі ұқсас мұз айлаққа кірген болатын. Ол кезде де қауіпті аймақтардан адамдарды биіктеу жерлерге көшірген. Бірнеше күн бойы соққан күшті желдің арқасында айсберг кейін шегінген.

Instagram парақшамызға жазылып, ең қызықты ақпараттарды бірінші болып оқыңыз!