Павлодар соты санитариялық талаптарды өрескел бұзу дерегі бойынша "B" мейрамханасының иесіне қатысты істі қарады, — деп хабарлайды Massaget.kz тілшісі.

Биыл 8 маусымда Павлодар қалалық санитариялық-эпидемиологиялық бақылау басқармасына жедел жәрдем станциясынан 7 маусымда "B" мейрамханасында өткен тойға келген азаматтардан жедел бактериялық ішек инфекциясы анықталғаны туралы хабарлама түскен.

Сол күні эпидемиологиялық тексеріс басталып, зертханалық сынамалар алынған. Тексеріс барысында мейрамхананың тиісті рұқсаттарсыз жұмыс істегені анықталды.

"9 маусымда қызметке тыйым салу туралы қаулы берілгеніне қарамастан, мейрамхана жұмысын жалғастырған. Соның салдарынан тамақтан улану деректері қайта тіркелді. 2025 жылғы 9 маусымда БКИ диагнозымен 18 шұғыл хабарлама тіркелді", — деп жазылған хабарламада.

Сот отырысында жеке кәсіпкер өз кінәсін толық мойындап, бұл жағдай бірінші рет және абайсыздықтан жасалғанын түсіндірген.

Сот ҚР ӘҚБтК-нің 462-бабының 3-бөлігін басшылыққа алып, жеке кәсіпкер Ж.-ны кінәлі деп танып, оған әкімшілік жаза ретінде 275 240 теңге айыппұл салды және "B" мейрамханасының қызметін бір ай мерзімге тоқтатты.

Қаулы заңды күшіне енген жоқ.

Еске салайық, бұған дейін Павлодарда тойда уланғандардың диагнозы анықталды.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!