Шымкентте жаңа туған 8 нәрестенің жүрегіне операция жасалды, деп хабарлайды 24KZ. Жоғары технологиялық операцияларға Беларусь кардиохирургтері жетекшілік етіп, туабітті жүрек ауруларын емдеудің ерекше әдістерін ұсынды. Ол үшін жүректегі қарынша аралық тесіктердің үлкеюі, артерияның тарылуы және бірнеше патологиясы бар науқастар таңдалған. Олардың ең кішкентайы туғанына небәрі 3 күн болса, қалғаны 2,5 айға дейінгі шақалақтар.

Дәрігерлердің айтуынша, операциядан кейін науқастардың өміріне төнген қауіп сейілген. Жергілікті дәрігерлер де шеберлік сабағына қатысып, кәсіби біліктілігін арттыруға мүмкіндік алды. Биыл көпбейінді балалар ауруханасының базасында күрделі хирургияны дамытуға көңіл бөлініп отыр. Осы мақсатты туа бітті жүрегінде ақауы бар сәбилерге жасалатын оперция санын 200-ге жеткізу жоспарланған.

Талғат Бердібеков, қалалық көпбейінді балалар ауруханасының бөлім меңгерушісі:

- Жедел түрде жасалынатын операциялар. Оларды күтуге баланың уақыты болмайды. Сондықтан бізде перзентханада туған 1 күндік, 5 күндік, 10 күндік нәрестелер осы сәтке түсіп қалды. Бұдан да мықты болу үшін осы мамандармен бірге білім алмасып, осындай операцияларды жасап жатырмыз.