Ақмола облысында алаяқтар ер адамның тоғыз миллион теңгесін алдап алған, — деп хабарлайды Massaget.kz тілшісі Polisia.kz сайтына сілтеме жасап.

26 маусымда Бұланды аудандық полиция бөліміне жергілікті тұрғын алаяқтық дерегі бойынша арыз түсірген. Қаскөйлердің әрекеті бірнеше кезеңнен тұрған күрделі схема болған.

Алдымен жәбірленушіге шетелдік нөмірден қоңырау түсіп, өзін ХҚКО қызметкері ретінде таныстырған адам оның атына маңызды құжаттар келгенін айтқан. Соларға қол жеткізу үшін sms арқылы келген кодты айтып беруін сұраған.

Кейін WhatsApp арқылы өзін банк өкілі ретінде таныстырған тағы бір адам хабарласып, жәбірленушінің атына кредиттер рәсімделіп жатқанын айтып, "көмектесеміз" деп сендірген. Осылайша жәбірленушіге "куратор" ретінде бір әйел бекітіліп, ол бірнеше банк қосымшаларын жүктеп, орнатуын сұраған.

Кейін видео қоңырау арқылы форма киген тағы бір ер адам шығып, жағдайдың өте қауіпті екенін айтып, нұсқауларды бұлжытпай орындауды талап еткен.

Бұл дерек бойынша қылмыстық іс қозғалып, соталды тергеу амалдары жүргізіліп жатыр. Қазір жедел-іздестіру жұмыстары жалғасып жатыр.

Полиция тағы да азаматтарға ескертеді:

– ешқашан sms-кодтарды бөгде адамдарға айтпаңыз;

– таныс емес адамдардың нұсқауымен ешқандай қосымша орнатпаңыз;

– бейтаныс нөмірлерден келген қоңырауларға сенбеңіз;

– үрейге бой алдырмай, ақпаратты тек ресми көздерден тексеріңіз.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!