Ташкентте ағаштардың цифрлық реестрін құру жұмыстары басталды. Жыл соңына дейін кемінде 1 млн ағаш туралы дерек электронды базаға енгізіледі. Бұл бағыттағы жұмыстар әрі қарай да жалғаса бермек .

Осы арқылы жасыл желек толық есепке алынып, заңсыз кесудің алдын алуға мүмкіндік болады. Бұл істі экология және цифрлық даму министрлігі бірлесіп жүргізеді. Жасанды интеллектің көмегіне жүгініп, GPS жабдығын қолдану көзделіп отыр. Цифрлық реестр ақпаратты жауапты ведомстволарға және құқық қорғау органдарына жедел жеткізуге мүмкіндік береді. Ең бастысы, соңғы кезде белең алған жасыл желекті заңсыз кесумен күресте таптырмас көмекшіге айналмақ.

Валижон Иброхимов, Экология министрлігі мемлекеттік бақылау инспекциясының бас маманы:

Ағаштарды заңсыз кескен, түп-тамырымен жұлып алып, зақымдаған немесе қайта отырғызуға әрекеттенген азаматтарға жаза қатаңдатылды. Әкімшілік кодекске сай жеке тұлғалар 25 тен 50 ге дейінгі базалық есепті көрсеткіш, яғни 8 бен 17 миллион сум аралығында айыппұл арқалайды.

Ал заңды тұлғалар үшін айыппұл көлемі 25 миллион сумнан асады. Бұл шамамен екі мың АҚШ доллары. Жасыл желек туралы деректер «green.tashkent.uz» платформасының электронды базасына енгізіліп отырады.

Базаркүл Отыншиева