Британияда биылғы жылдың ең ыстық күні тіркелді.

Денсаулық сақтау агенттігі қауіптіліктің сары деңгейін ұзартуға мәжбүр. Ескертуге сәйкес аптап ыстық денсаулық сақтау жүйесіне салмақ салып, тек осал топтарды емес, бүкіл халықты әбігерге түсіріп жатыр.

Ұлыбритания

Ғалымжан Қараманұлы, тілші:

- Ұлыбритания метеорологиялық қызметі елде температураның ең жоғары көрсеткіші тіркелгенін мәлімдеді. Сынап бағанасы 34,7 градусты көрсетті. Ылғалдылығы жоғары аймақ тұрғындары үшін бұл үлкен сынақ.

Денсаулық сақтау агенттігі ескерту жариялап, халықты абай болуға шақырды. Әсіресе егде адамдар мен созылмалы ауруы бар науқастарға қауіп жоғары.

БЛИЦ:

- Климаттың өзгеруі қатты алаңдатады. Мен Лондонда ондаған жыл бойы өмір сүріп келемін және әрине ахуалдың нашарлағанын сеземін. Көңіл құлазытады.

- Иә, бұл ыстық әбден мазамды қашырды. Бұл шынымен де адам төзгісіз жағдай.

Кәрі құрлықта да күн күйіп тұр. Португалия, Италия және Грецияда бірнеше күннен бері температура төмендеген жоқ. Испанияда 46 градусқа дейін көтерілді. Ал Францияның құрлықтық бөлігі түгелдей дерлік апат аймағы деп жарияланды.

Клэр Нуллис, БҰҰ жанындағы дүниежүзілік метеорологиялық ұйымның ресми өкілі:

- Аптап ыстық қазір сирек құбылыс емес. Ол үйреншікті жағдайға айналып барады және көбіне «үнсіз жан алушы» деген атауға ие болып жүр. Құрбандардың саны ресми статистикада жиі төмен көрсетіледі.

Ғалымдардың айтуынша, жаһандық жылынудың әсерінен атмосферада ыстық ауа көптеп жиналып жатыр. Нәтижесінде күннің ысуы жиілеп, ұзаққа созылуда. Климатологтардың пайымдауынша, маусым айындағы аптап ыстықтың қайталану ықтималдығы индустриалды дәуірге дейінгі кезеңмен салыстырғанда 100 есе жоғары болып тұр.

Ғалымжан Қараманұлы, тілші:

- Бүгін Тұманды Альбионда күн едәуір салқындайды деген болжам бар. Бірақ Еуропаның кейбір аймақтарындағы ауа температурасы жоғары болып қала бермек.

Ғалымжан Қараманұлы