Елімізде қоғам мүлкін қирататындар азаймай тұр. Жыл басынан бері мүсіндер мен ескерткіштер, аялдамалар, көшедегі орындық , үйдің лифтісіне дейін сындырып кететін 1500-ге жуық факт тіркелген. Азаматтардың вандализмге құмар болуына не себеп? Оған қандай жаза қарастырылған?

Астанада жыл басынан бері 54 азамат қоғам мүлкін қиратқаны үшін қамауға алынған. Одан бөлек, вандализм ісі бойынша 80 азамат әкімшілік жауапқа тартылып, 26 тұрғын 4 миллион теңгеден астам айыппұл төлеген.

Полицияның мәліметінше, парктердегі орындықтарды қиратып, әлеуметтік мекемелердің терезесін шағып, лифтті талқандайтындар 14 пен 28 жас арасындағылар. Кесір әрекетке барғандардың басым бөлігі не үшін сындырдың, неге бүлдірдің деген сұраққа не айтарын білмейтін көрінеді.

Асқар Пабышев, Байқоңыр аудандық Полиция басқармасының учаскелік инспекторы:

Қылмыстық кодексте ең ауыр жаза – 294-бап бойынша: 50 АЕК-тен жоғары, 150 АЕК-ке дейін айыппұл салынады немесе қоғамдық жұмыстарға тартылады – 180 сағатқа дейін және де бас бостандығынан айырылады – 2 жылға дейін. Бұл ең ауыр есептік көрсеткіш болып саналады.

Ал психологтар: «бір нәрсені талқандауға талпынып тұратындар көбіне өзінің ішкі үнін, ойын әлеуметке жеткізе алмайтын адамдар», — дейді.

Себебі вандализм агрессияның шектен шыққан көрінісі. Олар қоғамдық мүлікті қирату арқылы өзіне назар аудартқысы келеді екен.

Назерке Амантайқызы, психолог:

Жалпы, өмірде өзінің рөлін алған белгілі жұмысы, білімі бар адамдар ондай іспен айналыспайды. Олар өзінің жауапкершілігін біледі, қоғамдағы белсенділігін біледі. Ненің дұрыс-бұрыс екенін ажырата алатын адамдар мұндай іс-әрекеттер қайталамайды.

Көпке ортақ мүлікті сақтауға бағытталған республикалық ауқымды акциялар жиі өткізіліп тұрады. Еріктілер ескерткіштерге салынған суреттер мен жазуларды өшіріп, өзгелерді айналаны ретке келтіруге шақырады.

Шерхан Ибраев, ерікті:

Біз тек қана осындай монументтерді тазалап қана қоймай, мәдени-қоғамдық орындарды да тазалап отырамыз. Бұрын адамдар тек инстаграм никнеймдерін жазатын болса, қазір жазулардың арасынан есірткі жарнамаларын да көп көретін болдық.

Ернұр Медет, тілші:

Заң күшейіп, тентектерді тезге салудың тетіктері қарастырылып жатыр. Бірақ ең бірінші мынаны түсінуіміз керек, дейді мамандар. Осы мен отырған орындық сынды қоғамдық мүліктен бастап, мыңжылдық мәдени мұралардың барлығы сіз бен біздің салығымыздан түскен қаражатқа салынған.

Ернұр Медет