Бүгін Түркістан қаласында қала әкімі Әзімбек Пазылбекұлының қатысуымен қалалық мәслихаттың кезектен тыс отыз төртінші сессиясы өтті.

Сессияға қалалық мәслихат төрағасы Ғаппар Амантайұлы төрағалық етті. Отырыста мәслихаттың 18 депутаты қатысып, күн тәртібіндегі маңызды мәселелер қаралды.

Сессия жұмысы барысында алдымен 2023 жылғы 30 наурыздағы №1/4–VIII «Сегізінші шақырылымдағы Түркістан қалалық мәслихатының тұрақты комиссияларын құру және тұрақты комиссия төрағаларын сайлау туралы» шешіміне өзгерістер енгізу мәселесі қаралды. Осы ретте жаңадан сайланған депутат Көкенов Ербол Нұралыұлы таныстырылып, «Табиғат қорғау, экологиялық мәселелер, құқық бұзушылықтың алдын алу мен қоғамдық қауіпсіздікті қамтамасыз ету жөніндегі» тұрақты комиссия құрамына енгізілді.

Күн тәртібіндегі екінші мәселе бойынша қала әкімі аппаратының басшысы Қуаныш Әлібеков қалалық әкімдіктің дербес құрамына келісім беру жөнінде хабарлама жасады. Талқылау нәтижесінде депутаттар ұсынылған шешімді бірауыздан қолдап, дауыс беру арқылы бекітті.

Сессия барысында қала басшысы Әзімбек Пазылбекұлы қорытындылап, депутаттарға бірлескен жұмыстары үшін алғыс білдірді. Қала әкімі өз сөзінде қала тұрғындарының әл-ауқатын арттыру, инфрақұрылымды дамыту, әлеуметтік және экономикалық тұрақтылықты қамтамасыз ету бағытында әкімдік пен мәслихаттың өзара түсіністік пен серіктестікке негізделген жұмыстың маңыздылығын атап өтті.

— Ағымдағы жылдың 9 айының қорытындысымен әлеуметтік, спорт және жол инфрақұрылымын дамыту бағытында бірқатар нәтижелерге қол жеткіздік. Бұл — әкімдік пен мәслихаттың ортақ еңбегінің жемісі. Алдағы уақытта да тұрғындар сенімін ақтап, қаланың өркендеуіне бірлесе үлес қосу – басты міндетіміз, — деді қала әкімі.

Сондай-ақ Әзімбек Пазылбекұлы жаңадан сайланған депутат Ербол Нұралыұлын құттықтап, халықтың мүддесін қорғауда адалдық пен белсенділіктің маңызын атап өтті.

— Депутаттық мандат — халық пен билік арасындағы маңызды көпір. Сіздің өмірлік тәжірибеңіз бен азаматтық ұстанымыңыз қаламыздың дамуына оң ықпал етеді деп сенемін, — деді қала басшысы.