Бүгін Сенат депутаттары «Қазақстан Үкіметі мен Қатар Үкіметі арасындағы Қазақстан Республикасынан келген жұмыскерлерді Қатар Мемлекетінде жұмысқа орналастыруды реттеу туралы келісімді ратификациялау туралы» Заңын мақұлдады, деп хабарлайды Egemen.kz.

Бұл келісімге 2024 жылғы 14 ақпанда Мемлекет басшысының Қатарға сапары барысында қол қойылған.

Құжат ел азаматтарының Қатарда ресми жұмысқа орналасуына құқықтық негіз жасап, тараптардың өзара міндеттемелерін қарастырады. Келісімге қосымша ретінде Қатардағы қазақстандық жұмысшылар үшін үлгілік еңбек шарты бекітілген.

Үлгілі еңбек шартында Қатар Мемлекетінің заңнамасына сәйкес жұмыс берушінің тұрғын үймен қамтамасыз ету немесе тұрғын үйге өтемақы төлеу, жұмысқа дейін және кері қайтуға тегін тасымалдау немесе көліктік жәрдемақы, медициналық қызмет көрсету, сондай-ақ жыл сайынғы еңбек демалысын қоса алғанда, жұмыстың барлық жағдайларын қамтамасыз ету жөніндегі міндеттемелері қарастырылған.

Сонымен қатар келісімнің орындалуын үйлестіру мақсатында бірлескен комитет құрылады. Қатар Мемлекеті осы Келісімді 2024 жылғы 29 қарашада ратификациялаған.