Ақтөбе облысындағы Хромтау қаласында индустриялық аймақ құрылады. Ол үшін 150 гектар жер бөлінген.

Қазіргі таңда қажетті инфрақұрылымды тарту үшін жобалық-сметалық құжат әзірленіп жатыр. Ол мемлекеттік сараптамадан өткен соң республикалық бюджеттің қарауына жіберіледі. Жоспар бойынша құрылыс-монтаж жұмыстары келесі жылы жүргізілуі тиіс.

Индустриялық аумаққа бөлінген жер «Дөң-Бадамша» тас жолына жақын. Мұнда «Өркен» өңірлік бағдарламасы аясында қолдау тапқан өндірістік нысандар орналасады. Сондай-ақ, бұған дейін табысты жұмыс істеп тұрған ірі кәсіпорындар да осында көшірілуі мүмкін. Саран қаласының үлгісі бойынша Хромтау, Сәтбаев, Балқаш және Құлсарыда индустриялық аймақтар құрылады. Президент былтырғы Жолдауында Саранның экономикасын әртараптандыру жұмысы жүргізіліп жатқанын әрі осы тәжірибені басқа да моноқаларға дем беру үшін қолдануды тапсырған.

Нұрхан Тілеумұратов, Хромтау ауданының әкімі:

Қазіргі таңда бірқатар кәсіпкерлер қызығушылық танытып, жобаларын жоспарлап жатыр. Жалпы бұл индустриялық аймақтың басты мақсаты – импортты алмастыру. Сонымен бірге жергілікті қамту үлесін арттыру. Қазіргі таңда Хромтау ауданында үш ірі кәсіпорын бар. Оның ішінде Дөң тау-кен байыту комбинаты, «Ақтөбе Мыс» және «Восход» компаниялары.

Жақсыбек Кемал