Қытайда 75 жастағы зейнеткер жасанды интеллект жасаған "қызға" ғашық болып, әйелінен ажыраспақ болған, — деп хабарлайды Massaget.kz тілшісі odditycentral.com-ға сілтеме жасап.

Beijing Daily хабарлауынша, қарт кісі әлеуметтік желіні қарап отырып, компьютермен жасалған виртуал қызды кездестірген. Цифрлық аватарларды танитындарға бірден жасанды екені білінеді, бірақ Жян есімді зейнеткер үшін ол жай ғана әдемі қыз болған. Зейнеткер "қызбен" бірден тіл табысып кеткен. Қыздың ернінің қимылы мен дауысы сәйкес келмейтіні де назар аудармаған.

Уақыт өте келе ол "онлайн ғашығына" соншалықты үйреніп алды, тіпті күні бойы телефонын қолынан тастамай, одан жаңа хабарлама күтумен жүрген. Бірде әйелі оған телефонға көп уақыт бөлгені үшін ұрысқанда, қария бірнеше жыл бірге тұрған жарына "Мен сенімен ажырасамын, бар өмірімді осы қызға арнаймын" деген.

Ақыр соңында Жянның балалары оған бұл қыздың өмірде жоғын түсіндірген, ол тек жасанды интеллект жасаған жалған бейне екенін айтқан.

Бұл Қытайда сирек кездесетін жағдай емес. Әсіресе жалғыз қалған, қимылы шектеулі қариялар жасанды интеллект "кейіпкерлерінің" құрбанына айналып жатыр. Ондай аватарлар түрлі бейнеде кездеседі: костюм киген "маман", "журналист" немесе "әдемі студент қыз". Оның көбі түрлі тауарларды жарнамалап, қарттар ойланбастан сатып алатын өнімдерді ұсынады. Кейбірін тіпті үгіт-насихат тарату үшін де пайдаланады.

Мамандар егде жастағы туыстарыңыздың интернеттегі әрекетіне мұқият болуға шақырды. Өйткені жасанды интеллекттің пайдалы қыры бар болғанымен, ол әлсіз әрі жалғыз адамдар үшін өте қауіпті болуы мүмкін.

Өзекті жаңалықтарды өз уақытында оқу үшін Facebook парақшамызға жазылыңыз!