Испания үкіметі Газа секторына әуеден 12 тонна азық-түлік тастады.
Қайырымдылық көмек шамамен 11 000 адамға шақталған. Алайда бірқатар халықаралық ұйымдар апатты аймаққа көмек жеткізудің бұл әдісін тиімсіз деп сынап жатыр. Ал испан билігінің мәлімдеуінше, әуе тасымалы қақтығыс аймағына жүк жеткізудің ең төте жолы.
2023 жылдың қазанынан жалғасып келе жатқан қақтығыстан Газа секторында 59 мыңнан аса палестиналық қаза тапты. 143 мыңнан аса тұрғын түрлі деңгейдегі дене жарақатын алды. Аштықтан ажал құшқандар да аз емес. Испания билігі Газадағы гуманитарлық ахуалды “қасақана жасалған апат” деп қатаң айыптайды және 2023 жылдан бері Израильмен арадағы қару саудасын толығымен тоқтатты. Дәл осы кезеңнен бастап Испания Газаға гуманитарлық көмек көрсетуді белсенді түрде жүргізіп келеді.
Хосе Мануэль Альберес, Испания сыртқы істер министрі:
- Испания Газадағы халыққа гуманитарлық көмекті жалғастыра береді. Тамыздың басында азық-түлік траншын әуе арқылы жеткіздік. Халықаралық ұйымдар мен кей саяси партиялар апатты аймаққа көмек жеткізудің бұл амалын тиімсіз деп сынады. Алайда Израиль мен Египет шекараларындағы жер үсті жолдары жабық және қатынас өте баяу екенін білеміз. Сол себепті әуе арқылы жеткізу жалғыз жол.
Осылайша Испания қарулы күштері, Сыртқы істер министрлігі және халықаралық ынтымақтастықтық агенттігі бірлесе отырып, тамыз айында әскери ұшақ арқылы 12 тонна азық-түлікті 34 парашютпен әуе арқылы жеткізді. Бұл шамамен 11 000 адамға арналған тағам рационы. Ұшақ Иордания аймағындағы әскери базадан ұшып шығып, Газа аймағының оңтүстігіне бағытталды. Жүктерді тарату үшін БҰҰ агенттіктері мен жергілікті ұйымдар үйлестіру жұмыстарына жұмылды.
Чема Вера, БҰҰ Балалар қоры Испания ұлттық комитетінің басшысы:
- Әуеден тасталған көмек түрлері жерге түскеннен кейін бақылаудың аздығынан сатылымға шығып кеткен. Дегенмен, Испания осы арқылы әлем елдерін Газадағы апатқа бей-жай қарамауға шақырады. Ал жерүсті өткелдерін шұғыл түрде ашу қажет.
Сондай ақ осы жылдың шілде айында Испания үкіметі Газа аймағындағы ауыр жарақат алған балалар мен олардың отбасыларына медициналық көмек көрсетті. Нақты айтқанда, Испанияның “Сарагоса” әскери базасына медициналық ұшақпен Газа аймағынан түрлі дене жарақатын алған 13 бала мен олардың 44 туысы жеткізілді. Испанияның “Аccem” және “Aman” деп аталатын гуманитарлық ұйымдары оларды жатын орынмен, ас-сумен қамтамасыз етіп, әкімшілік, психологиялық және құқықтық қолдау көрсетті.
Аида Қыдырбай, Дмитрий Рогач
