Атырау облысының Ресеймен шекаралас Құрманғазы ауданын дамыту бойынша 33 жоба жүзеге асады.

Бұл жұмыстар Президенттің «шекара маңындағы ауылдарды дамыту» туралы тапсырмасына сәйкес жүргізіліп жатыр. Аудандағы 12 елдімекенде кәсіпкерлердің демеушілігімен бірнеше нысан салынады, инженерлік инфрақұрылымы жаңартылады.

Қазақстан мен Ресейді бөліп жатқан, мына – Қиғаш өзені. Еділден бөлініп аққан өзен бойында 12 елдімекен орналасқан. Соның бірі – Бірлік ауылы. Мұнда қазір 2 мыңнан аса тұрғын бар. Шекара маңындағы елдімекендерді дамыту бағдарламасы аясында ауылда спорт алаңы пайдалануға берілді. Мәдениет үйінің құрылысы жүріп жатыр. Орталық саябақ қайта жаңғыртылуда.

Нариманбек Шолтырұлы, ауыл тұрғыны:

- Елу жылда ел жаңа,- дейді ғой. Бұл ауылда да біршама өзгеріс, әсіресе, соңғы кездері көп өзгеріс болып жатыр. Қазір үлкен, заманауи футбол алаңы салынып, оның да жақында ашылуы болды. Содан бері ауыл жастары осы алаңға келіп, кешкілік футбол ойнап, түрлі-түрлі салауатты өмір салтын қалыптастыруға мұның да игі ықпалы тиіп жатыр деп ойлаймын.

Бауыржан Ақпанов, ауыл тұрғыны:

- Ауылымыздағы көріктендіру жұмыстары, балалар ойын алаңы, жазғы спорт алаңдары, кіреберістегі аркалар қолға алынып, жақсы жұмыс жасалып жатыр. Енді бұрыннан істеліп жатқан жұмыстар бар ғой. Соның ішінде мына шекаралық аймақты дамытуда жақсы-жақсы жұмыстар атқарылып жатыр.

Мұндай бастамалар демеушілер есебінен жүзеге асырылып жатыр. Ірі мекемелермен жасалған мемарандум арқасында ауыл халқының жайлы өмір сүруіне жағдай жасалған.

Нұрдәулет Дәрелов, Бірлік ауылдық округінің әкімі:

- Бірлік ауылдық саябағы біткеннен кейін балалар ойын алаңын қайта жаңғырту жұмысын жүргізетін болады. Сонымен қатар жарық мәселесі, көше жарығы бойынша бізде 130-дың үстінде жарықшамдар бар. Оның биыл барлығы диодтық шамдарға ауыстырылды. Алдағы уақытта жаңа көшелерге де жарықшамдарын орнату жоспарымыз бар.

Бірлікке іргелес жатқан Кудряшов ауылдық округінің құрамына 3 елдімекен кіреді. Халық саны 2 мыңға жуықтайды. Қазір мұнда да демеушілікпен спорт кешені салынып жатыр. Сондай-ақ 2 медициналық нысанның құрылысы аяқталған.

Бахтияр Вахитов, Кудряшов ауылдық округінің әкімі:

- Президентіміздің тапсырмасына сәйкес, шекара маңындағы аймақтарды дамыту бойынша спорт кешенінің құрылыс жұмыстары жүріп жатыр. Ауыл жастарын түрлі спорттық секцияларға баулитын барлық мүмкіндік қарастырылған. Қазіргі таңда ауылдық мәдениет үйінің жобалық-сметалық құжаттамасы дайын. Ендігі кезекте қаржы бөлу мәселесі күтілуде.

Жалпы Құрманғазы – шекарада орналасқан жалғыз аудан. Мұндағы 12 елдімекенді дамыту үшін 33 жоба қолға алынды. Бүгінде соның 19-ы толық аяқталып, қалған 14 нысанның құрылысы жүріп жатыр. Елдің шетінде, шекараның өтінде орналасқан елді мекендерде халықтың көп шоғырлануы маңызды. Ал ол үшін тұрғындарға қолайлы жағдай жасау керек.

Асланбек Шығыр, Амантай Мәтенов, Жандос Рахметуллин, 24KZ