Бүгін елімізде су шаруашылығы қызметкерлері күні. Мерекеге орай Президент сала мамандары мен ардагерлерге «Парасат», «Құрмет», III дәрежелі «Еңбек даңқы» ордендері мен «Ерен еңбегі үшін» медалін табыстады. Сондай-ақ бірнеше жұмысшыға «Қазақстанның су шаруашылығы саласының еңбек сіңірген қайраткері» құрметті атағы берілді. Жиында Мемлекет басшысы су қауіпсіздігі Қазақстанның орнықты дамуына әсер ететін негізгі мәселеге айналғанын атап өтті. Сондай-ақ су дипломатиясын күшейтуді қолға алу керек. Трансшекаралық өзендер бассейніндегі суды тиімді пайдалану жүйесін жолға қою үшін көршілес мемлекеттермен ықпалдастыққа мән берген жөн,-деді Қасым-Жомарт Тоқаев.

Қасым-Жомарт Тоқаев, Қазақстан Республикасының Президенті:

Ең алдымен кәсіби мерекелеріңіз құтты болсын дегім келеді. Баршаңызды құттықтаймын! Су бүкіл тіршіліктің – көзі. Су әлемдегі барлық елдер үшін аса маңызды стратегиялық маңызды ресурс. Біздің кеңбайтақ жеріміз бар. Алайда ел аумағының басым бөлігі шөл және шөлейт жерлер. Сондықтан Қазақстан үшін су мәселесі – Ұлттық қауіпсіздік мәселесі десек артық болмайды. Бұл сала әрдайым мемлекеттің айрықша назарында.

Мемлекет басшысы 2023 жылы Су ресурстары және ирригация министрлігі құрылғанын еске салды. Бүгінде мамандар саны артты. Жұмысшылардың жалақысы былтыр 25 пайызға өсті. Биыл тағы 50 пайызға дейін көтеру жоспарланып отыр. Дейтұрғанмен халықтың тіршілігін, егіннің берекесін, қалалардың келешегін қамтамасыз етіп отырған жұмысшылар бүгін алғаш рет жоғары марапат иеленді.

Раушан Жайсамбекова, «Қазақ су шаруашылығы ғылыми-зерттеу институты» ЖШС бөлім меңгерушісі:

Бүгінгі марапат өте маңызды деп есептеймін. Президентіміз Қасым-Жомарт Тоқаевтың су шаруашылығы қызметкерлерін марапаттап жатқанына қуаныштымын.

Қайырбек Көшекпаев, ҚР Су ресурстары және ирригация министрлігі «Қазсушар» РМК «Есіл су» филиалының учаске бастығы:

Қобалжып тұрмыз. Бұл енді менің жетістігім емес, мекеменің жетістігі. Президент қолдап, жұмысты одан жақсы істеуге тырысамыз. Ақтаймыз деп айтуға болады.

Нұрсұлтан Тілектес