Қоржынымызда үш медаль .

Қырғызстан астанасы Бішкек қаласында күрес түрлерінен жасөспірімдер арасындағы Азия чемпионаты өтіп жатыр.

Жарыстың кезекті күні қыздар арасындағы бәсекелер болды. 15 жасқа дейінгілер бәсекесінде 10 қызымыз аттанған болатын. Араларынан 58 келіде Арина Қуанышова күміс жүлдегер атанды. Ал 42 келідегі Раян Жамсапқызы және 66 келідегі Әсемай Бурахан қолаға қол созды. Қазақстан құрамасының қалған өкілдері бүгін бозкілемге шығып, қоржындағы жүлделер санын арттыруға тырысады. Бішкек қаласындағы Азия чемпионаты 9 шілдеге дейін жалғасады.

Қазақ жігіттері Азия чемпионы атанды. Астанада ауыр атлетикадан жасөспірімдер мен жастар арасындағы құрлықтық дода жалғасып жатыр. Жарыстың кезекті күні ұлдар арасындағы сындар өтті. Әсіресе 70 келідегі қазақстандық Едіге Емберді Азия рекордын жаңартып, Азия чемпионы атанды. 20 жасқа дейінгілер арасында сынға түскен ол серпе көтеруде 194 келіні басынан асырды. Бұл құрлықтық деңгейдегі ең жоғары көрсеткіш. Ал қоссайыс қорытындысы бойынша 347 келіні бағындырды. Сәйкесінше алтын медал жеңіп алды. Күміс те қазақстандық спортшыға бұйырды. Ақжол Құрманбек қоссайыс қорытындысы бойынша 343 келіні көтерді. Ал үздік үштікті өзбекстандық Хайитбой Абдушукуров түйіндеді. 17 жасқа дейінгілер санатында да қазақ баласы рекорд тіркеді. Нұржан Жұмабай серпе көтеруде 175 келіні бағындырып, ең үздік нәтижеге қол жеткізді. Ал қоссайыс қорытындысы бойынша көрсеткіші — 315 келі. Ол да өз жас деңгейінде чемпион атанды. Жалпы алғанда бүгінге дейін ұлттық құрама өкілдері 9 алтын, 1 күміс және 6 қола жеңіп алып, жалпы командалық есепте бірінші орында келе жатыр. Екінші орында Вьетнам, үшінші орында Үндістан құрамалары.

Таэквондошыларымыз әлем кубогінде жүлдеге ілікті. Аталмыш спорт түрінің дүниежүзілік додасы Оңтүстік Кореяның Чхунчхон қаласында өтіп жатыр. Қазақстандық жігіттер командалық сында өте сәтті өнер көрсетіп, қола жүлдеге қол созды. Шешуші сында ұлттық құрама өкілдері Марокко спортшыларынан басым түсті. Қорытынды есеп: 2:1. Ел намысын Бекасыл Ергеш, Абдрахман Марипов, Мерген Ғаниев және Нұрбек Ғазез сияқты спортшылар қорғады. Енді бүгін әйелдер арасындағы командалық бәсекелер болады. Біздің алғашқы қарсылас – Қытай құрамасы. Чхунчхон қаласындағы жарыс 9 шілдеге дейін жалғасады.