Қонаев қаласының кәсіпкерлері жергілікті атқарушы биліктің іс-әрекетіне наразы, деп хабарлайды 24KZ. Олардың айтуынша, қалалық әкімдік өздерін маусымдық жұмыстан айырып, нәпақадан қақпақшы. Бұл мәселеге өңірлерді аралауға шыққан Парламент Мәжілісінің депутаттары араласты.

Қонаев қаласында 8 жағажай бар. Онда 42 кәсіпкер жазғы шомылу маусымы кезінде демалушыларға қызмет көрсетеді. «Қалалық әкімдіктегілер бізді жағалаудан қудалап жатыр», – дейді олар.

Бауыржан Ужбеков, кәсіпкер:

- Жерді ЖКХ беруі керек. ЖКХ-дан кем дегенде бізге үш жылға берсе, үш жылда біз ештеңе салмасақ, ештеңе жасай алмасақ, сонда айтсын: «Сендер жасай алмадыңдар», – деп. Ал енді бізге үш ай жазда береді, үш ай жаздың ішінде маған әкім келіп, «сен не істедің?», – деп. Ал менде келісімшартта қатты «строение» салынбасын, тек жеңілі рұқсат етілетіні туралы жазылған. Мен көтеріп алып кететіндей топчан ғана қоя аламын.

Қамбар Баекенов, кәсіпкер:

- Біз ұзақ мерзімге сұрап отырмыз. 5 жылға, 7 жылға. Сол кезде бізде өзіміздің атымыздан, кәсіпкерлердің атынан инвестиция болады. Қандай жоба керек, сол жобаны біз жасаймыз. Соны сұрап жатырмыз. Коммуналдық мекеме, міне, 8 жылдай болды, бұл мәселені әлі күнге дейін дұрыстап қалпына келтірмей жатыр. Туризм объектілерін туризм шешуі керек.

Жергілікті кәсіпкерлер өңірлерді аралау мақсатымен Қонаев қаласына келген Мәжіліс депутаттарынан осы мәселені шешуге тікелей араласуын сұрады.

Екатерина Смолякова, ҚР Парламенті Мәжілісінің депутаты:

- Халық демалып жатыр. Өзіміздің ел бар, келетін ел бар. Бірақ инфрақұрылымы дамымаған. Инфрақұрылым өте бір қарқынды дамытуды қажет етеді. Сондықтан ары қарай осы сұрақты қалай шешеміз, бүгін күні бойы осы жерде болып, халықпен, қазір кәсіпкерлермен кездесіп, ары қарай шешу жолдарын қарастырамыз.

Қалалық әкімдіктегілер болса жағалауды жалға беру келісімшартының күзге дейін жасалғанын және оның одан ары қарай ұзартылмайтынын алға тартты.

Төлеген Кенжебеков, қала әкімінің орынбасары:

- Енді Қонаев қаласы облыстың орталығы болды ғой. Облыстың орталығы болғаннан кейін бұл кісілер де оған негізі қарсы емес, өзгеруі керек, жандануы керек. Түрленіп, жаңа бір кезеңге өтуі керек қой. Бұрынғыдай емес, әдемі болып. Өздеріңіз де жаңа барғанда көрген шығарсыздар, қазіргі келбеті облыстық қаланың деңгейіне сәйкес келмейді. Біз сіздерге тек қана уақытша жалға бердік. Уақытша жалға берудің уақыты біткеннен кейін сіздердің ол жерге құқықтарыңыз жоқ, былайша айтқанда.

Жергілікті атқарушы билік өкілдерінің айтуынша, алдағы жылы коммуналдық меншіктегі жағажайларда жаңа жобалар жүзеге асады. Бір жағажайды заман талабына сай абаттандырып, ондағы демалушыларға көрсетілетін қызмет сапасын жақсарту үшін кем дегенде 2-3 млрд теңге қажет. «Оны кәсіпкерлеріміздің қалтасы көтермейді. Сондықтан мұнда келер жылы ірі инвесторлар келе бастайды», – деді қалалық әкімдіктегілер.

Авторлары: Ардақ Айбарұлы, Аят Дүйсенбаев, Аманжол Жөңкешов